Portali prestigjioz “Goal.com” ka evidentuar faktin historik dhe mjaft interesant, ku tregon se Franca nuk është e para dhe e vetmja që arrin finalen e dytë radhazi të Botërorit: pas “Rusia 2018” edhe “Katar 2022”, që do të luhet nesër. Arritja në finale e një Botërori nuk është për të gjithë. Ja shkrimi i plotë i tij:
Çështja bëhet edhe më e ndërlikuar nëse e keni fituar tashmë trofeun në edicionin e mëparshëm. Nuk është e lehtë të përsërisësh veten, veçanërisht në një kompeticion që luhet çdo katër vite. Franca ia ka dalë.
Duke mposhtur Marokun në gjysmëfinale, skuadra e Didier Deschamps arriti të kualifikohej në finalen e “Katar 2022” dhe e bëri këtë si kampione në fuqi, pas suksesit të arritur në “Rusia 2018”. Megjithatë, “Les Bleus” nuk janë të vetmit që kanë arritur, si kampionë, në finalen e këtij kompeticioni. Le të zbulojmë së bashku se cilat kombëtare të tjera ia kanë dalë.
ITALIA 1934 – 1938
Kombëtarja e parë që arriti të dilte në finalen e një Botërori për dy edicione radhazi, si kampione në fuqi, ishte Italia e drejtuar nga Vittorio Pozzo, i cili pasi fitoi Kupën e Botës në shtëpi më 1934, duke mundur Çekosllovakinë, e përsëriti atë në edicionin e ardhshëm. Luajti në Francë, duke mposhtur Brazilin në gjysmëfinale dhe pastaj u përball duke luajtur kundër me Hungarinë në aktin final. Në “Colombes”, axurrët fituan 4-2 falë golave të Colaussi dhe Piola, që i dhanë kombëtares italiane Botërorin e dytë radhazi.
BRAZILI 1958 – 1962
Të njëjtin fat pati edhe Brazili, i cili së bashku me Italinë mbetet e vetmja kombëtare që fitoi dy Kupa Bote radhazi. Pasi fitoi në “Suedia 1958”, mundi mikpritësit me rezultatin 5-2 dhe hyri në histori për golin e Zagallo dhe goditjet e Vava e Pelé. “Seleçao” u prezantua në Kili më 1962 si favorite e madhe.
Dhe i përmbushi pritshmëritë. Pelé (i cili u dëmtua në fillim të turneut) dhe shokët e tij, pasi mposhtën Kilin në gjysmëfinale, luajtën finalen kundër Çekosllovakisë me mundësinë e madhe për të përsëritur suksesin e edicionit të kaluar. Tha dhe e bëri: 3-1, firmosur nga Amarildo, Zito dhe Vava. Historia e realizuar.
ARGJENTINA 1986 – 1990
E treta që arriti të dilte në finalen e një Kupe Bote si kampione në fuqi ishte Argjentina e Diego Armando Maradonës, e freskët nga fitorja në “Meksikë 1986”. Ajo përfundoi në finalen kundër Gjermanisë Perëndimore (dhe u bë ikonë nga “Mano de Dios” në çerekfinale kundër Anglisë). “Seleccion” më pas e përsëriti udhëtimin e vet triumfal në “Italia ’90”, duke mposhtur axurrët në gjysmëfinale, në “San Paolo” të Napolit, me penallti pas barazimit 1-1 në kohën e rregullt (nënshkruar nga Schillaci dhe Caniggia). Në finale, megjithatë, u përjetua drama albiceleste, me penalltinë e realizuar nga Brehme që ia dorëzoi Gjermanisë Perëndimore në “Olimpico” trofeun.
BRAZILI 1994 – 1998
Brazili është kombëtarja e fundit që ka arritur në tri finale radhazi të Kupës së Botës: 1994, 1998 dhe 2002. Midis tyre janë dy që përfaqësonin, para Francës, ekipin e fundit të mëparshëm që mund të kualifikohej në aktin final si kampion në fuqi. Pas fitores me penallti kundër Italisë në “SHBA ’94”, “Seleçao” u paraqit si kampione në “Francë ’98”, me një rrugëtim që kulmoi me sukses, përsëri me penallti, në gjysmëfinale kundër Holandës. Nga pika e bardhë ishin vendimtare gabimet e Cocu dhe Ronald de Boer. Në finale, pra, Brazili u përplas me Francën nikoqire, që fitoi 3-0 në një nga pasditet më të çuditshme në historinë e futbollit botëror, që kurorëzoi jo vetëm “Les Bleus”, por mbi të gjitha Zinedine Zidane.
FRANCA 2018 – 2022
Dhe tani ia ka dalë edhe Franca e Didier Deschamps, e aftë për të përsëritur rrugën perfekte të “Rusia 2018”, e cila më pas kulmoi me suksesin ndaj Kroacisë në finalen 4-2. Duke mposhtur Marokun me golat e Theo Hernandez dhe Kolo Muani, “Les Bleus” do të prezantohet në stadiumin “Lusail” për të sfiduar Argjentinën si kampionë në fuqi të botës.
