Mesazhet e shkëmbyera nga bërthama e fortë e ish-bordit drejtues të klubit të futbollit Barcelona, i kryesuar nga Josep Maria Bartomeu, zbulojnë armiqësinë e mprehtë që lidershipi i klubit asokohe kishte ndaj “peshave të rënda” në dhomat e zhveshjes. Ato përdoren fyerje të rënda, veçanërisht ndaj Leo Messit. Ylli nga Rosario dhe gjithashtu Gerard Pique ishin padyshim më të urryerit.
Në këto biseda në WhatsApp, Román Gómez Ponti, në atë kohë kreu i shërbimeve ligjore të Barçës, më elokuenti nga të gjithë, flet me bezdi të veçantë. Bartomeu, Òscar Grau, i cili ishte CEO i klubit, menaxherë si Jordi Moix, Oriol Tomàs dhe David Bellver, drejtori financiar Pancho Schroder dhe Javier Sobrino, drejtor i Strategjisë dhe Inovacionit, gjithashtu morën pjesë në disa nga këto biseda.
Ditën e publikimit nga “El Mundo” të kontratës së Messit, grupi i “chat”-it u zemërua, veçanërisht për origjinën e rrjedhjes së informacionit. Është dita kur Gómez Pontí lëshoi një “breshëri fjalësh” pa respekt kundër Messit.
Është 31 janar 2021, të gjithë tashmë janë jashtë klubit. Ndër të tjera zbulohet një mesazh i supozuar i argjentinasit për presidentin, në të cilin Messi i thotë atij gjatë pandemisë se mund të prekë pagën e lojtarëve të tjerë, por jo pagën e tij apo të mikut të tij Luis Suarez.
“Barto, me të vërtetë, nuk mund të jesh një person kaq i mirë me këtë miun e kanaleve. Klubi i ka dhënë gjithçka dhe ai është përkushtuar për të vendosur një diktaturë nënshkrimesh, transferimesh, rinovimesh, sponsorësh vetëm për të etj.
Unë kurrë nuk do ta bëja dot, por rinovimi i Pinto, i Suarezit dhe ai i Jordi Alba, apo komisioni i rinovimit për Fati (Rodrigo Messi ishte agjent) duhet të shtohen në shifrat e kontratës së tij. Dhe mbi të gjitha akumulimi i shantazheve dhe vrazhdësisë që klubi dhe ne që punojmë kemi pësuar nga ky xhuxh hormonal, që i ka borxh jetën Barçës…
Kur gjërat shkojnë keq (pandemia), kapiteni i shkruan presidentit në WhatsApp: “Uli rrogat e të tjerëve, por mos më prek mua dhe Luis (Suarez). Shpresojmë që të marshojë mes indiferencës së njerëzve, çka është gjëja më e keqe që mund t’i ndodhë atij”.
“Po”, – pajtohet presidenti. Bartomeu shkon pak më tej: “Jam dakord për shumë gjëra, por së pari Barça dhe ky lloj artikulli dëmton imazhin e klubit”. Në këto biseda spekulohet se Joan Laporta, ende në fushatë elektorale, ishte autori i mundshëm i rrjedhjes së informacionit.
Ish-drejtori Oriol Tomàs e bën këtë. Bartomeu është dyshues ndaj kësaj hipoteze, megjithëse të gjithë duket se janë dakord se kjo është një mënyrë për ta detyruar Messin të largohet dhe në këtë mënyrë të kursejë 120 milionë euro.
Në një moment, Bartomeu pranon se “shumë herë e kemi dëgjuar Leon, jo gjithmonë, por shumë herë, dhe kjo kontratë pa qenë pandemia ishte plotësisht e pranueshme”. Bartomeu thekson se Messi përfaqësonte 15% të buxhetit dhe se “ishte korrekte duke marrë parasysh gjithçka që ai gjeneron”.
Me të gjithë ata ende në klub, ndodhi debakli turpërues i Lisbonës kundër Bayernit (8-2). Gómez Ponti është i pamëshirshëm me Gerard Piqué, pasi tha se duheshin ndryshime në të gjitha nivelet e klubit.
Lehtësia e publikimit të kontratave të lojtarëve në mes të krizës së Covid-it vihet në disa raste në gojën e Gómez Pontit. Në një letër të gjatë drejtuar Bartomeut, ai shprehej: “Nën drejtimin tuaj, klubi duhet të përballet me uljen drastike të masës së pagave të ekipit të parë të futbollit, aq më tepër pas qëndrimit të paparaqitshëm e të neveritshëm të një stafi të llastuar dhe milionerësh të pandjeshëm që kanë refuzuar të bien dakord me klubin për reduktimet minimale të pagave për të siguruar qëndrueshmërinë tonë ekonomike, pavarësisht vuajtjeve të njerëzve”.
Sergio Busquets, gjithashtu merr goditje nga Gómez Ponti në këtë letër, në të cilën ai këshillon Bartomeu të shkarkojë “ata lojtarë që nuk kanë treg dhe nuk mund të transferohen (Busquets mund të jetë një shembull i shkëlqyer). T’i shkarkojmë me një kompensim minimal, duke treguar për mungesën e mbështetjes së tyre ndaj klubit në kohë të vështira”.
