Zjarri në Himarë, Policia shoqëron çobanin piroman, dyshohet se i vuri flakën zonës nga shpërtheu vatra katastrofike!

Një person është shoqëruar në Komisariatin e Policisë së Vlorës pasi ekziston dyshimi se ai ka qenë përgjegjës për zjarrin që shpërtheu në zonën pranë by-pass-it të Vlorës. Flakët, të cilat u përhapën me shpejtësi për shkak të erës së fortë, arritën të përfshijnë dhe lagjen nr. 1 në Himarë gjatë mbrëmjes së premtes.

Sipas të dhënave paraprake, i shoqëruari punon si çoban dhe kullot kafshët në territorin afër vendit ku shpërtheu vatra. Hetuesit po punojnë për të vërtetuar përfundimisht rolin e tij në ngjarje.

Zjarri doli kontrollin e zjarrfikësve dhe shkaktoi dëme të mëdha. Plot gjashtë banesa u dogjën krejtësisht, duke shkatërruar jo vetëm strehën e tyre, por dhe pasurinë e banorëve. Për të shmangur rrezikun, shumë familje dhe turistë u detyruan të largohen menjëherë nga shtëpitë dhe hotelet.

Lufta me flakët vazhdoi gjatë gjithë natës. Ekipet e zjarrfikësve dhe të emergjencave u angazhuan në terren për të izoluar vatrat dhe për të parandaluar përhapjen e mëtejshme. Në orët e para të mëngjesit të së shtunës, situata u duk më e qëndrueshme, por puna për shuarjen përfundimtare vijoi.

Autoritetet thanë se hetimet janë duke vijuar. Objekti kryesor i tyre është të përcaktohet me saktësi nëse çobani i shoqëruar është apo jo përgjegjës për ndezjen e zjarrit katastrofik.