Vrau shqiptarin në servis dhe e dogji brenda makinës, merr kthesë krimi makabër në Itali! Gjykata drejt përgjysmimit të dënimit ndaj autorit

Cristiano Mossali pranon përgjegjësinë për vdekjen e shqiptarit Nexhat Rama, por mbetet në diskutim një detaj kryesor: a ishte akti një vrasje e paramenduar apo jo. Ky është ndryshimi që do të përcaktojë dënimin përfundimtar të 56-vjeçarit nga Capriolo, i cili aktualisht vuan një dënim prej 14 vitesh burg pasi gjykata e Apelit e reduktoi ndjeshëm dënimin fillestar prej 27 vitesh.

Mossali, një mekanik automjetesh, u dënua fillimisht me 27 vjet burg për vrasjen e bashkëatdhetarit tonë në servisin e tij dhe djegien e trupit bashkuar me makinën e viktimës në një zonë të izoluar. Gjykata e Apelit, megjithatë, zbuti dënimin në 14 vjet, duke argumentuar se provat nuk ishin të mjaftueshme për të vërtetuar paramendimin.

Tashmë çështja ka shkuar në një instancë të re, dhe Mossali, i cili është në burg që nga shtatori i katër viteve më parë, pret të mësojë nëse do të kthehet në dënimin e rëndë ose do të qëndrojë në atë më të lehtë. Gjithçka varet nga vendimi përfundimtar mbi natyrën e krimit.

Në thelb të gjykimit të ri qëndron prova e paramendimit. Prokuroria ka insistuar gjithmonë se Mossali kishte planifikuar vrasjen, ndërsa mbrojtja ka kundërshtuar këtë version. Dallimi midis një krimi të paramenduar dhe një vrasje të çastit është thelbësor në ligjin italian, pasi mund të ndryshojë dënimin me mbi dhjetë vite burg.

Për familjen e Nexhat Ramës, kjo vonesë në përfundim të procesit zgjat vuajtjen e tyre. Ata presin një drejtësi që të reflektojë plotësisht rëndësinë e aktit të kryer ndaj të dashurit të tyre. Gjykata e Lartë do të duhet të përcaktojë tashmë, nëse fajësia e Mossalit mbulon gjithashtu edhe planifikimin e mëparshëm të krimit makabër.

Data e seancës së radhës në gjykatën e lartë italiane nuk është bërë ende publike. Deri atëherë, 56-vjeçari do të vijojë të qëndrojë pas hekurave, në pritje të fjalës së fundit të drejtësisë për fatin e tij të ardhshëm. Gjithçka tani varet nga përgjigja e pyetjes: e paramenduar apo jo?