Vrasja e Urim Fikut në Bulqizë, policia gjen një kallashnikov dhe gëzhoja në banesë

Hetimet për vrasjen e 62-vjeçarit Urim Fiku në fshatin Gofdaj të Bulqizës kanë marrë një rrjedhë të re. Kjo erdhi pas gjetjes së provave të reja gjatë kontrollit të hollësishëm në banesën e viktimës.

Mëngjesin e kësaj të marte, policia gjeti në kasollen e banesës një armë automatike, lloji kallashnikov. Ajo kishte fishekë në karikator dhe një plumb në fole.

Kontrolli u bë pasi një ditë më parë, afër vendngjarjes, u sekuestruan tre gëzhoja automatike. Kjo rriti dyshimet për përdorimin e dy armëve të ndryshme gjatë krimit. Gëzhojat dhe armët e sekuestruara do t'i nënshtrohen një ekspertize krahasuese balistike.

Pozicioni i gëzhojave, të gjetura në distanca nga njëra-tjetra, ngriti dyshimin se viktima u ndoq me vrap nga autori. Ai e qëlloi nga mbrapa. Më pas, ndaj 62-vjeçarit u përdor edhe një sëpatë. Goditjet shkaktuan dëmtime të rënda në kokë.

Grupi hetimor pret akt-ekspertimin nga Mjekësia Ligjore për të përcaktuar shkakun e saktë të vdekjes. Në të njëjtën kohë, po punohet për identifikimin e një personi të tretë të dyshuar si i përfshirë. Gjykata ka caktuar masën "arrest në burg" për bashkëshorten dhe djalin e viktimës, Sadete dhe Gazmir Fiku.