Shqiptari i dënuar me 19 vite burg për vrasje humb në Angli betejën e bllokimit të ekstradimit

Një shtetas shqiptar, i dënuar me 19 vite burg për vrasje, ka dështuar në përpjekjen për të bllokuar ekstradimin e tij nga Mbretëria e Bashkuar. Ai ishte arrestuar në Britani më 10 dhjetor 2024, pas lëshimit të një urdhri ndërkombëtar nga Interpol Tirana.

Vendimi i fundit vjen nga Gjykata e Ekstradimeve City of Westminster Magistrate Court. Gazetari i Top Channel, Muhamed Veliu, siguroi dokumentet e këtij vendimi, sipas të cilit kërkesa për ekstradimin e Pëllumb Lleshit është pranuar plotësisht.

Gjykata iu bind argumenteve të prokurorisë, të mbrojtura nga Amanda Bostock. Ajo argumentoi se Lleshi duhet t'i vihet në dispozicion të autoriteteve shqiptare për të ekzekutuar dënimin e shqiptuar në mungesë.

Ana mbrojtëse, e përfaqësuar nga avokatët Joel Smith KC dhe Louisa Collins, nuk arriti të bindë trupin gjykues. Ata paraqitën argumente kundër ekstradimit, por gjykata i hodhi poshtë.

Për t'i dhënë formë finale këtij vendimi, dosja i është dërguar sekretares së shtetit, Shabana Mahmood, për nënshkrimin e saj.

Megjithë qenien person në kërkim, sipas të dhënave të gjykatës, Llleshi kishte kaluar edhe një proces tjetër në Angli. Në vitin 2014, ai ishte akuzuar për plagosje me dashje dhe përdorim dokumenti të falsifikuar, për çka mori një dënim me kusht që e kishte shlyer.

Gjykata në vendimin e saj rikthen ngjarjen e krimit, që ka lidhje me një vrasje të ndodhur në Greqi në vitin 2003. Më 2 mars 2011, Gjykata e Elbasanit shpalli fajtor Pëllumb Lleshin dhe pesë të tjerë për këtë vrasje.

Prokuroria e Elbasanit kishte nisur hetimet pas kallëzimit të babait të viktimës, Bajram Hila nga fshati Katund i Ri. Ai paditi pesë të pandehurit për vrasjen e të bilit, Bilbil Hila, më 24 nëntor 2003, në vendin e quajtur "Anaviso" në Greqi.

Prokurori Elvin Gokaj deklaroi në atë kohë se ngjarja kishte ndodhur në bashkëpunim. Të pandehurit Kasem Vrapi, Atmirant Dragoti, Ilia Pire, Eduart Pepa dhe Pëllumb Lleshi kishin goditur dhe masakruar viktimën me mjete të ftohta, duke i shkaktuar vdekjen.

Trupi gjykues i Elbasanit vendosi dënimin maksimal për këtë vepër penale. Kasem Vrapi u dënua me 20 vite burg, ndërsa Pëllumb Lleshi me 19 vite. Dënime të tjera morën edhe të akuzuarit e tjerë, duke filluar nga 18 vite deri në 16 vite burgim.

Prokuroria vuri në dukje se çështja kishte qenë e vështirë për hetuesit. Vështirësitë lidheshin me marrjen e provave nga Greqia, numrin e madh të të akuzuarve dhe faktin se të gjithë pranuan fajësinë.