Policia kap “skifterin” që i vodhi çantën shtetases gjermane te Liqeni Artificial

Policia vë në pranga 41-vjeçarin që grabiti me thikë turisten gjermane te Liqeni Artificial

Një 41-vjeçar nga Tirana ka rënë në prangat e Policisë si autor i dyshuar i grabitjes me dhunë të një shtetaseje gjermane te Liqeni Artificial. Bëhet fjalë për shtetasin J. S., i cili akuzohet se i mori me forcë çantën me sende personale 50-vjeçares, duke e kërcënuar me armë të ftohtë.

Ngjarja u denoncua si vjedhje me dhunë nën kërcënimin e thikës. Vetëm një ditë më pas, viktima T. K. u paraqit në ambientet e Komisariatit Nr. 1 në Tiranë. Ajo kishte shkuar për të falënderuar punonjësit që trajtuan rastin.

Policia bëri me dije se turistja ka vlerësuar ndërhyrjen e menjëhershme të uniformave blu. “Duke vlerësuar reagimin e shpejtë të Policisë, identifikimin dhe arrestimin në kohë rekord të autorit të dyshuar, si dhe gjetjen e sendeve të saj personale, shtetasja gjermane ka shprehur mirënjohjen e saj për punën dhe profesionalizmin e efektivëve të Policisë së Komisariatit Nr. 1”, thuhet në njoftim.

Sapo mori sinjalizimin për grabitjen, Komisariati Nr. 1 nisi operacionin e koduar “Reaction”. Hetimet dhe veprimet operacionale u kryen pa vonesë. Falë tyre u arrit të identifikohej dhe më pas të ndalohej i dyshuari.

Sipas bluve, sendet personale që iu morën shtetases së huaj u gjetën dhe iu kthyen asaj. Ndërkohë materialet procedurale janë dërguar në Prokurori. I arrestuari do të hetohet për veprën penale “Vjedhja me dhunë”.