Njihuni me sozinë e Ronaldos që ka mbi 400 mijë ndjekës në rrjetet sociale

Quhet Luca, por kërkon t'i thonë Cristiano. Jo një Cristiano i rastësishëm, por pikërisht ai, CR7. Vetëm këto tre shkronja dhe një numër mjaftojnë për të sjellë në mendje yllin portugez, shkruante La Stampa.

Me të njëjtën logjikë, pseudonimi "Crspera" të çon direkt te Luca Sperandio nga Orbassano. Ai njihet si sozia jozyrtare e Ronaldos. Ka ndërtuar një komunitet aq të madh në Instagram, sa mund t'i ngjallë edhe pak zili kampionit luzitan, edhe pse nuk i rrezikon fronin.

Mbi 400 mijë llogari ndjekin çdo ditë postimet, story-t dhe videot e shkurtra që publikon Luca. Për të, ky aktivitet është bërë pothuajse një punë e dytë. Dhe sërish, lidhja mbetet futbolli.

Ndryshe nga idhulli i tij, Sperandio nuk luan në Portugali. Ai mbron ngjyrat e Garinos, një formacion i kategorive të ulëta që po kryeson kampionatin me fitore të plota. Në fushë pozicionohet si qendërmbrojtës, jo si sulmues.

Këtu mbyllen dallimet. Ngjashmëria fizike është befasuese. Edhe mimika dhe gjestet duken identike.

28-vjeçari e kujton qartë momentin kur e kuptoi forcën e kësaj ngjashmërie. "Një ditë mamaja më mori nga shkolla dhe më dërgoi në Caselle", rrëfen ai. "Avioni i Real Madridit, me CR7 në bord, do të ulej pak më vonë. Skuadra spanjolle kishte ndeshje ndaj Juves në qytet. Deri atëherë nuk i kisha dhënë peshë ngjashmërisë. Aty disa gazetarë gati më ngatërruan me të. Në atë çast mendova të krijoja një personazh në rrjete sociale: gjysmë Cristiano, gjysmë Luca".

Vëmendja e madhe erdhi pas disa videove që u shpërndanë me shpejtësi me protagonistë influencues të njohur. "Më pas nisa të prodhoj vetë materialet e mia", shton ai. "Një arsye ishte se kam luajtur gjithmonë futboll. Kam qenë disa sezone në akademinë e Juventusit, ndaj di si të lëviz në fushë. Kështu lindi në vitin 2023 profili 'crspera' në Instagram. Sot ka kaluar 600 postime".

Një nga videot e tij u kthye në fenomen. Aty shfaqet duke bërë ushtrime me topin bashkë me djalin e Deborës, parukieres së tij. Klipi arriti 86 milionë shikime dhe e bëri shumë të njohur.

"Në fillim më duhej një fotografi e Ronaldos për të kërkuar të njëjtin model flokësh. Tani gjithçka vjen më natyrshëm", thotë Sperandio. Ai sqaron se pamja nuk është rezultat i ndërhyrjeve. "Dua të theksoj se nuk kam bërë asnjë operacion plastik. Imitimi im është me humor dhe lozonjar. E kuptoj plotësisht diferencën mes nesh: ai është kampioni, unë jam amatori që di të tallet me veten".

Përmbajtja në faqen e tij ndahet kryesisht në dy drejtime. Nga njëra anë rikrijon lëvizje ikonike në fushë, si goli me roveshatë ndaj Juventusit, për të cilin u deshën shumë prova deri te versioni final. Nga ana tjetër sjell skena nga jeta e CR7, të riinterpretuara me ironi.

Nëse Cristiano jep intervistë me fanellën e Al-Nassr, "Crostino", siç vetëquhet me shaka, del përpara kamerës me uniformën e Garinos. Një nga përshkrimet e tij ironizon: "Mendon se je Ronaldo që luan sulmues, por je Rataldo që luan mbrojtës".

Pseudonimet nuk mungojnë. "Rotondo, Robaldo, Ranaldo. Komentuesit në internet, që janë të shumtë, më kanë pagëzuar me emra të tillë", tregon ai. "Atëherë i thashë vetes: pse të mos qeshim pak me këtë histori".

Me gjithë famën virtuale, Sperandio thotë se i mban këmbët në tokë. Ai është larg imazhit të yllit që interpreton. Jep mësim për fëmijët që duan të luajnë futboll, drejton një shkollë sportive dhe është diplomuar në Shkenca Sportive. Te Garino nuk ndihet si VIP. Për shokët e ekipit mbetet thjesht Luca.

Jashtë fushe vëmendja nuk mungon. "Kur dal të shëtis qenin, njerëzit më shohin çuditshëm. Njëherë dy vajza më ndoqën nga pas se menduan se isha CR7. Tani jam mësuar", rrëfen ai me buzëqeshje.

Vetëm pak ditë më parë udhëtoi drejt Lisbonës për të parë nga afër ndeshjen e Portugalisë. U shfaq i veshur si Ronaldo, si zakonisht. Në tribuna shumëkush pyeste i hutuar nëse Cristiano i vërtetë ndodhej në fushë apo mes tifozëve.