Ndezën zjarre pranë Parkut të Apolonisë dhe rrezikuan banesat, 2 piromanë të arrestuar dhe një nën hetim në Fier!

Dy persona kanë përfunduar në pranga në Fier dhe një i tretë po hetohet në gjendje të lirë. Ata dyshohen se kanë ndezur tre vatra zjarri në zona të ndryshme të qarkut.

Flakët shkaktuan dëme të konsiderueshme. Sipërfaqe pyjore, toka të kultivuara, pemëtore dhe ullishte u dëmtuan nga përhapja e tyre. Në rrezik u vunë edhe banesa dhe objekte pranë zonave ku u përhap zjarri.

Sipas Policisë, identifikimi i autorëve të dyshuar u bë pas njoftimeve për vatra të reja në territor. Komisariati i Policisë Fier, në bashkëpunim me Drejtorinë Vendore të Policisë, ndërhyri me veprime të shpejta hetimore dhe operacionale.

Pas verifikimeve u arrestuan dy shtetas. Bëhet fjalë për P. Z., 66 vjeç, i dyshuar për zjarrvënien në fshatin Ade. I dyti është D. K., 62 vjeç, i dyshuar për zjarrin në fshatin Kashisht.

Ndërsa D. M., 35 vjeç, po procedohet penalisht pa masë ndalimi. Ai dyshohet si autor i vatrës së zjarrit në fshatin Drizë.

Hetimet paraprake tregojnë se zjarret e ndezura prej tyre janë përhapur me shpejtësi. Përveç dëmeve në mjedis dhe bujqësi, flakët kanë krijuar rrezik konkret për banesat. Situata më problematike u shënua në Drizë dhe në zonën përreth Apolonisë.

Materialet procedurale janë dërguar tashmë në Prokurorinë pranë Gjykatës së Shkallës së Parë të Juridiksionit të Përgjithshëm Fier. Aty do të përcaktohen hapat e mëtejshëm ligjorë.