Miratohet unanimisht propozimi i Veliajt, Këshilli Bashkiak shpall “Qytetarë Nderi” të Tiranës 4 ish-drejtuesit e UÇK-së!

Këshilli Bashkiak i Tiranës ka shpallur “Qytetar Nderi” katër ish-drejtuesit e Ushtrisë Çlirimtare të Kosovës. Vendimi u mor sot me votë unanime.

Bëhet fjalë për Hashim Thaçin, Kadri Veselin, Jakup Krasniqin dhe Rexhep Selimin. Propozimi për nderimin e tyre u paraqit nga kryebashkiaku Erion Veliaj dhe mori miratimin e plotë të këshilltarëve.

Nisma kishte kaluar më parë edhe në filtrin e komisioneve përkatëse. Komisioni Artistik-Kulturor i Bashkisë e miratoi gjithashtu unanimisht. Kjo erdhi pas propozimit të sjellë nga Komisioni i Titujve, që drejtohet nga historiani Pëllumb Xhufi.

Në vlerësimin e bashkisë theksohet roli i katër figurave në luftën për çlirimin e Kosovës. Ata janë vlerësuar për kontributin në rrugëtimin drejt lirisë dhe pavarësisë, si dhe për lidhjet e ngushta që kanë mbajtur me Tiranën dhe Shqipërinë.

Vendimi i Këshillit Bashkiak i nderon ata për kontributin historik brenda UÇK-së dhe për angazhimin në proceset që sollën shtetësinë e Kosovës.

Motivacionet e dhëna për secilin prej tyre theksojnë mbështetjen e aleatëve euroatlantikë.

Për Hashim Thaçin vlerësohet kontributi i çmuar në Luftën Çlirimtare, përfaqësimi politik i saj dhe ecja e Kosovës drejt lirisë e pavarësisë me mbështetjen e fuqishme të SHBA-së dhe partnerëve euroatlantikë. Veçohet gjithashtu lidhja e tij e veçantë me Tiranën dhe roli në forcimin e marrëdhënieve mes dy vendeve.

Për Kadri Veselin çmohet kontributi në UÇK dhe në rrugëtimin e Kosovës drejt pavarësisë, po ashtu me mbështetjen e vendosur amerikane dhe euroatlantike. Në motivacion përmendet lidhja e veçantë me kryeqytetin shqiptar dhe përkushtimi për afrimin dhe bashkëpunimin dypalësh.

Për Jakup Krasniqin nderimi lidhet me kontributin në luftën çlirimtare, me përfaqësimin politik dhe me rrugën drejt shtetndërtimit me krahun e SHBA-së dhe aleatëve. Theksohet edhe lidhja e hershme e tij me Tiranën, si një nga qendrat e rëndësishme të mbështetjes politike dhe qytetare për Kosovën.

Për Rexhep Selimin vlerësohet kontributi në UÇK dhe në përpjekjen për liri e pavarësi, gjithmonë me mbështetjen e partnerëve strategjikë perëndimorë. Motivacioni nënvizon lidhjen e veçantë me Tiranën, qytetin që edhe në ditët e luftës qëndroi pranë Kosovës dhe popullit të saj.