Mbi 6 mijë rrënjë ulliri shekullorë të djegur nga zjarri! Përmirësohet situata me flakët në Himarë, banorët apelojnë për ndihmë

Në Himarë, zjarri i madh i mbrëmshëm që shpërtheu rreth orës 20:00 në kodrat përreth qytetit tashmë është vënë nën kontroll. Megjithatë, dëmet e shkaktuara nga flakët mbeten të konsiderueshme. Erërat e forta dhe temperaturat e larta ishin faktorët kryesorë që bënë që zjarri të përhapej me shpejtësi të madhe.

Shërbimi zjarrfikës i Himarës u detyrua të kërkojë ndihmë për shkak të vështirësisë së terrenit dhe përmasave të flakëve. Në terren u angazhuan rreth 300 forca, duke përfshirë zjarrfikësit dhe Forcat e Armatosura. Bashkia e Himarës e përshkroi situatën si tejet të vështirë.

Sipas të dhënave të banorëve, zjarri shkatërroi mbi 6 mijë rrënjë ullinj shekullorë. Gjashtë banesa u dëmtuan, prej të cilave tre ishin të braktisura. Për shumë prej tyre, ky ishte zjarri më i madh që kishin parë në dekada.

Nënkryetari i Bashkisë, Pervin Gjikuria, tha për Televizionin Shqiptar se stafi lokal kaloi momente të vështira mbrëmjen e djeshme. Falë ndërhyrjes së shpejtë, flakët u izoluan dhe situata u qetësua.

Megjithatë, strukturat mbeten në gatishmëri. Autoritetet paralajmërojnë se rreziku nuk ka kaluar plotësisht. Trungjet e djegur të ullinjeve, vatrat e nxehta dhe humusi mund të ndezin sërish flakët. Forcat në terren vijojnë të monitorojnë zonën për të parandaluar çdo rikthim të mundshëm të zjarrit.

Banorët bëjnë thirrje për ndihmë dhe kujdes maksimal nga të gjithë. Autoritetet u kërkojnë qytetarëve të tregohen të vëmendshëm në ditët e ardhshme.