Kryebashkiaku i Patosit në dëgjesë me qytetarët, nuk pranojnë bashkimin me Fierin

Bashkia Patos organizoi një takim të hapur me banorët mbrëmjen e së mërkurës. Diskutimi kishte në qendër propozimin për reformën administrative-territoriale, e cila parashikon bashkimin e Patosit me Bashkinë Fier.

Fjalën e hapjes e dha kryetari i Këshillit Bashkiak, Armand Ahmetaj. Më pas, kryebashkiaku Fatjon Duro paraqiti argumentet e tij kundër këtij bashkimi. Ai vuri në dukje tre elementë kryesorë: funksionalitetin financiar, gjendjen ekonomike, si dhe kohezionin territorial e aksesin e banorëve.

“Të gjithë treguesit e analizës së reformës tregojnë se Bashkia Patos renditet ndër më të mirat në rang republike”, u shpreh Duro. Sipas tij, indeksi i funksionalitetit dëfton se Patosi ka kapacitet të vetë-mbajtjes. “Performanca jonë funksionale është dukshëm më e mirë se ajo e Fierit”, shtoi ai.

Kryebashkiaku theksoi edhe disa shifra konkrete. “Niveli i borxhit të bashkisë është zero. Jemi të parët në nivel qarku dhe të tretët në rang kombëtar për pjesën e investimeve”, vuri në dukje ai. “Reforma nuk ka marrë formën përfundimtare, por sipas treguesve të vetë komisionit parlamentar, Patosi qëndron shumë mbi bashkitë e tjera të qarkut”, përfundoi Duro.

Në sallë ishin të pranishëm qytetarë, anëtarë të Këshillit Bashkiak dhe përfaqësues të grupeve të interesit. Gjatë diskutimit, ndaj propozimit të bashkimit me Fierin u shpreh një kundërshti e prerë dhe unanime. Për të pranishmit, Patosi është shumë më tepër se një tabelë rrugore, një indeks statistikor apo një distancë kilometrash. Ata folën për histori të veçantë dhe identitet të fortë lokal.

Vlen të përmendet se kryebashkiaku Duro dhe Këshilli Bashkiak do të vazhdojnë konsultimin publik. Takime të tjera me banorët parashikohen edhe në njësitë administrative të tjera të bashkisë në ditët e ardhshme.