Karriget e konsumuara në selinë e OKB-së bëhen simbol i gjendjes së organizatës

Gjendja e karrigeve në selinë qendrore të Kombeve të Bashkuara në Nju Jork është kthyer në simbol të krizës që ka përfshirë vetë organizatën ndërkombëtare. Mobiliet e konsumuara u përdorën si metaforë për lodhjen institucionale të OKB-së.

Pamja u fiksua brenda Sallës së Konferencave 1, në kompleksin kryesor të Organizatës në Nju Jork. Fotografinë e publikoi Sergiy Kyslytsya. Ai ka shërbyer më parë si ambasador i Ukrainës pranë OKB-së dhe sot mban postin e zëvendësdrejtuesit të parë të Zyrës së Presidentit të Ukrainës.

Sipas Kyslytsyas, pamja e karrigeve të vjetra pasqyron realitetin e organizatës. Ai vlerëson se OKB-ja ka mbetur pas kohës dhe kërkon një reformë rrënjësore. “Është e vjetruar, ka humbur rrugën dhe ka nevojë për një reformim të thellë”, shkroi ai.

Diplomati tha se një pjesë mendon se zgjidhja është rikthimi te origjina. Në këtë kontekst ai kujtoi Konferencën e Jaltës të vitit 1945. Aty u ulën në një tryezë udhëheqësit e Bashkimit Sovjetik, Shteteve të Bashkuara dhe Mbretërisë së Bashkuar, përkatësisht Josef Stalin, Franklin Roosevelt dhe Winston Churchill.

“Trungu i OKB-së u rrit nga farat e mbjella në Jaltë nga Stalini, Ruzvelti dhe Çërçilli, dhe tashmë nuk është më një shtyllë e paqes”, u shpreh Kyslytsya. Ai ngriti dyshime nëse sekretari i ardhshëm i përgjithshëm do të arrijë ta rikthejë peshën e organizatës. Sipas tij, kjo mbetet e vështirë për sa kohë Rusia ruan vendin e përhershëm në Këshillin e Sigurimit.

Moska është pjesë e pesëshes me status të përhershëm në Këshillin e Sigurimit, krahas Shteteve të Bashkuara, Kinës, Francës dhe Mbretërisë së Bashkuar. Si e tillë, ajo gëzon edhe të drejtën e vetos.