Irani vendos pesë kushte për rikthimin e bisedimeve me SHBA-në

Irani ka paraqitur kushtet për rikthimin e bisedimeve diplomatike me Shtetet e Bashkuara, pas një takimi të zhvilluar të mërkurën në margjinat e Asamblesë së Përgjithshme të Kombeve të Bashkuara.

Delegacionet amerikane dhe iraniane shkëmbyen mesazhe përmes ndërmjetësve, ndërsa Teherani ka dhënë detaje të reja rreth diskutimeve.

Zëdhënësi i Ministrisë së Jashtme iraniane, Esmaeil Baghaei, tha se procesi zgjati rreth dy orë dhe se gjatë tij palës amerikane iu përcollën qëndrimet dhe kushtet e Iranit për rikthimin e diplomacisë.

Sipas tij, kushtet e Teheranit janë “të qarta dhe transparente” dhe synojnë krijimin e kushteve që, sipas Iranit, do të mundësonin rifillimin e negociatave pa paqartësi apo justifikime nga palët.

Ndër kushtet e paraqitura nga Irani është përfundimi i bllokadës detare amerikane dhe i asaj që Teherani e cilëson si “terrorizëm ekonomik”.

Irani kërkon gjithashtu përfundimin e luftës në të gjitha frontet dhe lirimin e aseteve iraniane që janë ngrirë ose kufizuar.

Një tjetër kërkesë lidhet me sigurinë e transportit detar në Ngushticën e Hormuzit. Teherani kërkon pranimin e një rruge të sigurt për lundrimin në këtë zonë, për të cilën thotë se ka arritur marrëveshje me Omanin.

Këto zhvillime vijnë në kohën kur SHBA-ja dhe Irani po përballen me tensione të larta, ndërsa përpjekjet diplomatike synojnë krijimin e kushteve për rikthimin e dialogut mes dy vendeve. /ABC24.AL/