FOTO/ Trafik droge me postë nga SHBA, kapen rreth 5 kilogramë e cilësisë së lartë me THC! Në pranga 20-vjeçari në Bathore, detajet e hetimit

Operacioni policor i koduar “Delivery” çoi në arrestimin e një 20-vjeçari në Bathore të Tiranës, i akuzuar për trafik droge me postë nga Shtetet e Bashkuara të Amerikës. I riu dyshohet se kishte porositur dhe pritur një sasi prej rreth 5 kilogramë drogë Cannabis me përmbajtje të lartë THC.

Gjatë hetimeve, shërbimet e Seksionit për Hetimin e Narkotikëve, nën drejtimin e Prokurorisë, bashkëpunuan me filialin “Qendra Tranzite” të Postës Shqiptare. Sipas Policisë, mjeti i provës u sekuestrua në formën e 8 paketimeve me substancë narkotike. Pesha totale e drogës u regjistrua në 4 kilogramë e 641 gramë.

Autoritetet konfirmuan se 20-vjeçari D.S. ishte destinacioni i dërgesës nga Amerika. Ai u vu në pranga pas finalizimit të operacionit më 5 shtator. Hetuesit po punojnë për të zbardhur rrjetin e mundshëm dhe personat e tjerë të përfshirë në këtë veprimtari.

Materialet hetimore janë dërguar në Prokurorinë e Rrethit Gjyqësor Tiranë për hetime të mëtejshme.