“Forcim i besimit të qytetarëve”- Ambasadorja Sousa takohet me kreun e KLP: Një sistem i fortë drejtësie, thelbësor për të ardhmen e Shqipërisë në BE

Ambasadorja e Bashkimit Europian në Tiranë, Sofia Moreira de Sousa, e konsideron një drejtësi funksionale dhe të qëndrueshme si kusht kyç për anëtarësimin e Shqipërisë në BE.

Qëndrimi u bë publik përmes një postimi në platformën X. Mesazhi erdhi pas takimit që diplomatja zhvilloi me kryetaren e Këshillit të Lartë të Prokurorisë, Mirela Bogdani.

Në fokus të bisedës ishin prioritetet kryesore të sistemit të prokurorisë në vend. Palët diskutuan për nevojën e llogaridhënies institucionale dhe për vijimin e reformës në drejtësi.

Sousa theksoi angazhimin e Brukselit për të mbështetur më tej institucionet e drejtësisë. Ajo garantoi se BE do të vazhdojë të kontribuojë për struktura të forta, të pavarura, efektive dhe të përgjegjshme.

Sipas saj, ky mbështetje lidhet drejtpërdrejt me ecurinë e Shqipërisë drejt BE-së. Po ashtu, synon të rrisë besimin e qytetarëve te sistemi i drejtësisë.

“Një sistem i fortë drejtësie është thelbësor për të ardhmen e Shqipërisë në Bashkimin Evropian. Gjatë takimit tim me Mirela Bogdanin, Kryetare e Këshillit të Lartë të Prokurorisë, diskutuam mbi prioritetet kryesore të sistemit të prokurorisë në Shqipëri, përfshirë llogaridhënien institucionale dhe vijimin e zbatimit të reformës në drejtësi. Theksova se BE-ja do të vazhdojë të mbështesë institucione të drejtësisë të forta, të përgjegjshme, të pavarura dhe efektive, duke kontribuar në rrugën e Shqipërisë drejt anëtarësimit në BE dhe në forcimin e besimit të qytetarëve te sistemi i drejtësisë”, u shpreh ambasadorja Sousa.