Falsifikimi i certifikatës së COVID, trajneri i Zvicrës për Xhakën: E ka kuptuar që ka bërë gabim! I bindur se do të gjejmë një zgjidhje

Trajneri i kombëtares së Zvicrës, Murat Yakin, ka komentuar situatën e Granit Xhakës pas çështjes së certifikatës së falsifikuar të vaksinimit gjatë pandemisë.

Sipas tij, kapiteni e ka pranuar gabimin. Gjithashtu ka marrë publikisht përgjegjësinë për veprimin.

“Graniti e ka kuptuar se ka bërë një gabim. Atij i vjen keq dhe publikisht e ka marrë përgjegjësinë”, u shpreh Yakin në një prononcim për gazetën “Blick”.

Fillimisht, Xhaka pritej të grumbullohej me Zvicrën në Belek për fazën përgatitore para ndeshjeve të ardhshme. Por pas diskutimeve me presidentin e Federatës Zvicerane të Futbollit, Peter Knabel, u vendos që ai të mungojë për disa javë me përfaqësuesen.

Qëllimi është shmangia e shpërqendrimit të skuadrës nga debati publik që ka shoqëruar këtë rast.

Yakin e cilësoi mungesën e mesfushorit si një humbje për ekipin në aspektin sportiv.

“Është sigurisht një keqardhje e madhe nga aspekti sportiv që duhet të bëj pa të”, deklaroi tekniku.

Ai vlerësoi se vendimi është i drejtë për momentin.

Sa i përket rikthimit në grumbullimin pasardhës, Yakin nuk dha një konfirmim përfundimtar. Çështja do të shqyrtohet nga SFV-ja në bashkëpunim me kapitenin, pas katër takimeve të kombëtares.

“Jam i bindur se do të gjejmë një zgjidhje të mirë për të gjithë”, theksoi ai.

Trajneri bëri të ditur se komunikon rregullisht me Xhakën. Ai vlerësoi gjithashtu sjelljen e futbollistit ndaj grupit.