Drejtori i AMP-së takohet me Zampollin, të Dërguarin e Trump! Në fokus lufta ndaj fentanilit dhe kundër trafikut të drogës

Drejtori i Përgjithshëm i Agjencisë së Mbikëqyrjes Policore, Klevis Qose, ka zhvilluar sot një takim me të Dërguarin Special të Presidentit të Shteteve të Bashkuara për Partneritetin Global, Ambasadorin Paolo Zampolli.

Takimi mes palëve u fokusua në çështje me interes të ndërsjellë, duke vlerësuar marrëdhëniet e shkëlqyera midis Shqipërisë dhe SHBA-së. U diskutua edhe për kontributin e rëndësishëm të ekspertizës amerikane në fushat e inteligjencës dhe sigurisë.

I dërguari i posaçëm i Presidentit Trump theksoi angazhimin e këtij të fundit që nga viti 2017 kundër fentanilit, një substancë e cilësuar si një nga drogat më të rrezikshme dhe një kërcënim serioz për jetën. Siç u bë me dije nga drejtori Qose, “shkakton pasoja të rënda dhe vdekje në masë”. Për këtë arsye, palët diskutuan rëndësinë e parandalimit, shkëmbimit të informacionit dhe forcimit të bashkëpunimit.

Gjatë diskutimeve u prek edhe çështja e Ambasadorit të ri të Shteteve të Bashkuara në Shqipëri. Kjo u pa si një mundësi konkrete për të thelluar dhe koordinuar më tej bashkëpunimin, veçanërisht në sferën e sigurisë.

Në përfundim, Agjencia e Mbikqyrjes Policore nënvizoi se Shqipëria dhe SHBA-të vazhdojnë të jenë partnerë të besueshëm dhe të rëndësishëm. Ata mbeten të bashkuar nga një marrëdhënie strategjike dhe angazhimi i përbashkët në forcimin e sigurisë dhe luftën kundër krimit të organizuar.