Deputetet e PS reagojnë pas sulmeve ndaj kolegeve: Dhuna nuk është protestë, të rishikikohet protokolli i sigurisë

Deputetet gra të Partisë Socialiste në Kuvend kanë dalë me një deklaratë të përbashkët, duke dënuar ashpër incidentet e fundit ku koleget e tyre Iris Luarasi dhe Ilva Gjuzi u përballën me fyerje, kërcënime dhe sulme fizike nga turma e protestuesve.

Në reagimin e tyre, ato theksojnë se kjo nuk është një ngjarje e izoluar. Sipas tyre, bëhet fjalë për një klimë të rrezikshme e cila po kthehet në normë: nga gjuha e urrejtjes po kalohet në agresionin fizik.

“Sot u ndodhi atyre, nesër mund t’i ndodhë çdo deputeti, gazetari apo qytetari që nuk i nënshtrohet presionit të turmës,” shprehen gratë deputete.

Ato kujtojnë se përpara se të kenë një funksion politik, ato janë së pari qytetare me të drejtat e garantuara nga Kushtetuta. Të drejtën për t’u lëvizur lirshëm dhe për të mos u sulmuar e gëzon çdo person, theksojnë ato.

Në deklaratë vihet theksi se e drejta për të protestuar është absolute, por nuk mund të shërbejë si alibi për dhunë. Sipas deputeteve, institucionet duhet të trajtojnë çdo akt dhune në mënyrë identike, pa bërë dallime politike.

Ato kanë një sërë kërkesash konkrete drejtuar organeve përkatëse. Së pari, Policisë së Shtetit u kërkohet të identifikojë menjëherë autorët e sulmeve dhe të bëjë publike pamjet e sigurisë. Drejtësisë i bëhet thirrje të nisë hetim të shpejtë dhe të pavarur.

Një kërkesë e rëndësishme i drejtohet edhe sigurisë së Kuvendit, ku propozohet një rishikim urgjent i protokolleve mbrojtëse për deputetët. Organizatorët e tubimeve duhet të distancohen qartë nga çdo formë dhune.

Për më tepër, deputetet e PS u bëjnë thirrje forcave politike dhe mediave të mos e justifikojnë dhunën në asnjë rast. Ata kërkojnë gjithashtu që organizatat e shoqërisë civile dhe ato për të drejtat e njeriut të reagojnë pa dy standarde.

Në fund, ato parashtruan një afat kohik. Brenda 72 orëve, autoritetet duhet të informojnë Kuvendin për masat e marra. Brenda 10 ditëve, duhet të paraqitet një raport i plotë mbi hetimin dhe masat parandaluese.

“Nuk do të lejojmë që dhuna të shndërrohet në folklor,” përfundojnë deputetet, duke ripërsëritur se demokracia mbrohet me fjalë e argumente, kurse aty ku nis dhuna, mbaron protesta dhe nis përgjegjësia.