Ankimimi për dënimin ndaj katër ish-krerëve të UÇK-së, zbulohen emrat e gjyqtarëve në panelin e Apelit në Hagë

Është bërë publike përbërja e Panelit të Apelit që do të shqyrtojë çështjen ndaj ish-krerëve të UÇK-së në Hagë.

Dhomat e Specializuara të Kosovës kanë konfirmuar gjyqtarët që do të trajtojnë apelimin për këtë aktakuzë. Njoftimi është dhënë përmes një email-i nga presidentja e këtij institucioni.

Sipas komunikimit zyrtar, në panel janë caktuar Michele Picard, Kai Ambos dhe Nina Jorgensen. Ata do të jenë anëtarët e trupit gjykues për fazën e apelimit.

Në njoftim theksohet se përzgjedhja është bërë mbi baza të qarta. “Në vendimin e saj, Presidentja mori parasysh kriteret e përcaktuara në Rregullën 4 të Rregullores për Caktimin e Gjyqtarëve, përfshirë përvojën dhe ekspertizën përkatëse, si dhe disponueshmërinë e gjyqtarëve në këtë kohë”, thuhet në email.

Vendimi për apelimin vjen pas dënimit të 16 shtatorit. Atë ditë Hashim Thaçi, Kadri Veseli, Rexhep Selimi dhe Jakup Krasniqi u dënuan me 81 vite burg në total. Ky vendim shkaktoi reagime dhe pakënaqësi të mëdha në Kosovë dhe Shqipëri. Në Prishtinë u organizuan edhe protesta të shumta.