Zjarr i fuqishëm në Kavajë, flakët i afrohen banesave, kërkohet ndërhyrja nga ajri!

Flakë të mëdha kanë pushtuar sot (9 shtator) zonën e Bagos në Kavajë, ku janë identifikuar disa vatra të ndryshme aktive. Situata u bë menjëherë shqetësuese për shkak të afërsisë së zjarrit me dy banesa përreth.

Ekipet e zjarrfikësve të Kavajës shkuan menjëherë në vendngjarje dhe po luftojnë për të shuar flakët. Një ndërhyrje e tyre e shpejtë arriti të frenonte avancimin e zjarrit drejt objekteve banesore, duke shmangur një dëm më të madh.

Megjithatë, zjarri mbetet aktiv dhe lufta për ta neutralizuar është ende larg përfundimit. Vështirësitë kryesore vijnë nga madhësia e sipërfaqes së përfshirë dhe nga terreni i pamundur për kalimin e mjeteve të rënda.

Pikërisht për këtë arsye, shërbimet e Emergjencave Civile në rajon kanë kërkuar ndërhyrjen ajrore. Një helikopter është i nevojshëm për të shpërndarë ujin mbi vatra që nga toka nuk arrihen dot.

Forcat në terren vijojnë operacionin e izolimit të vatrave kryesore. Objektivi i tyre kryesor është mbrojtja e banesave dhe parandalimi i përhapjes së mëtejshme të flakëve drekt të tjera.