“Zhbllokoni pagat tona”- Mbyllet mbledhja në KLGJ, gjyqtarët paralajmërojnë: Reagimi ynë do të përshkallëzohet! Zbatoni vendimin e Kushtetueses

Mbyllet mbledhja urgjente e gjyqtarëve shqiptarë, të cilët paralajmërojnë se masa të reja do të merren nëse nuk u bllokohen pagat. Përfaqësuesit e trupit gjykues u bënë thirrje institucioneve dhe Presidentit të Republikës që të zbatojnë menjëherë vendimin e Gjykatës Kushtetuese.

"Ne nuk kërkojmë epërsi mbi dikë. Kërkojmë vetëm atë që na takon sipas ligjit. Vendimi përfundimtar nuk mund të pezullohet. Pagat duhen zhbllokuar menjëherë", deklaroi gjyqtarja Alda Sadiku pas takimit.

Ajo paralajmëroi se nëse nuk plotësohen kërkesat, masa do të shkallëzohen. Gjyqtarët mund të pezullojnë punën e tyre, duke përjashtuar vetëm çështjet me rëndësi të veçantë.

"Garancia kushtetuese nuk varet nga dikush që mban fondet publike. Çdo kundërshtim ndaj vendimit të Gjykatës Kushtetuese duhet të shkojë në rrugë ligjore. Thesari s’mund të shndërrohet nga mjet ekzekutimi në mjet pezullimi", u theksua në deklaratën zyrtare. Shtohej se nuk ka më vend për vonesa apo zgjidhje gjysmake.

Asambleja e Përgjithshme e Gjyqtarëve, e mbledhur në mënyrë të jashtëzakonshme, e cilësoi situatën si një cenim të drejtpërdrejtë të autoritetit kushtetues dhe pavarësisë së drejtësisë. Vendimi Nr. 15/2026 i Kushtetueses është përfundimtar e i detyrueshëm. Sipas gjyqtarëve, asnjë organ shtetëror nuk mund t’i pezullojë efektet e tij me mosveprim apo interpretim financiar.

U renditën edhe arsye ligjore të tjera. Pas 31 korrikut 2026, formula e shpallur antikushtetuese nuk mund të zbatohet më. Mosveprimi i ligjvënësit nuk e ringjall normën e shfuqizuar. Gjithashtu, pagesat e administratës gjyqësore nuk janë pjesë e qëndrimit refuzues të Ministrisë së Financave.

"Në një shtet kushtetues, buxheti duhet t’i shërbyejë Kushtetutës, jo e kundërta", u theksua në dokument.

Përballë kësaj gjendjeje, gjyqtarët kërkuan ndërhyrje të menjëhershme. Tre janë kërkesat kryesore: Zhbllokimi i pagave pa vonesë për të gjithë, zbatimi i plotë i vendimit të Kushtetueses dhe i vendimit Nr. 435 të KLGJ-së, si dhe njohja e pagave nga organet tatimore sipas parametrave ligjorë.