Zelensky jep detaje se çfarë diskutoi me Trumpin

Presidenti ukrainas Volodymyr Zelensky ka ndarë detaje nga komunikimi i fundit me homologun amerikan Donald Trump. Fokusi i bisedës ishte propozimi për një ndalim të përkohshëm të sulmeve mbi objektet energjetike midis Kievit dhe Moskës.

Ashtu si edhe më herët, ai ngriti dyshime mbi vullnetin e Kremlinit për të respektuar një marrëveshje të tillë. Sipas tij, mbetet e paqartë nëse pala ruse është vërtet e përgatitur për një pauzë në luftime.

Në deklaratën për mediat, Zelensky u shpreh: “Nëse ata nuk duan që ne të sulmojmë naftën për naftëgjeneratorët, ne jemi të gatshëm, nëse ata nuk do ta sulmojnë sistemin tonë energjetik”. Ai shtoi më tej: “Jemi të gatshëm për çdo lloj formati të armëpushimit energjetik… për të gjithë sektorin energjetik, për gjithçka”.

Shefi i shtetit ukrainas theksoi gjithashtu hapjen për dialog të drejtpërdrejtë. Ai deklaroi: “Trump mund të organizojë një takim trepalësh, jam gati të takohem me Putinin në çdo kohë”.

Nga ana tjetër, presidenti amerikan Donald Trump është shprehur se kreu i Kremlinit Vladimir Putin është “i gatshëm të takohet” për të biseduar mbylljen e konfliktit në Ukrainë. Lajmi u raportua nga Sky News.

Ky pohim është përsëritur disa herë nga Trump gjatë tentativave për të ndërmjetësuar një marrëveshje paqeje. Megjithatë, Putini shpesh nuk ka pranuar një takim ballë për ballë me Zelenskyn. Herë pas here ai ka kushtëzuar dialogun duke kërkuar që ai të mbahet vetëm në Moskë.

Trump u shpreh më tej me tone optimiste. Ai tha: “mendoj se të dy duam që lufta të përfundojë, të jem i sinqertë me ju. Është koha”. Më pas shtoi: “Shumë njerëz po vriten dhe ata nuk e duan këtë. Por mendoj se të dy, Putini dhe Zelensky, duan që lufta të përfundojë”.

Lufta u nis nga presidenti rus Vladimir Putin me pushtimin në shkallë të gjerë të Ukrainës në vitin 2022.