Vlora Hyseni u mor në pyetje nga SPAK për lidhjen me Agasin, ish-kreu i SHISH: Kam kontakte vetëm me telefon dhe si bashkëpunëtor i shërbimit sekret

Vlora Hyseni dyshohet për kontakte të vazhdueshme me Ergys Agasin edhe në periudhën kur ai ishte shpallur në kërkim.

Burime hetimore bëjnë me dije se SPAK e ka pyetur pesë ditë më parë. Nuk ishte hera e parë. Ajo u dëgjua në statusin e personit në dijeni dhe ka pranuar komunikimin me Agasin, duke e paraqitur atë si bashkëpunëtor të shërbimit. Sipas versionit të saj, SHISH-i punon gjithmonë përmes bashkëpunëtorëve.

Në aparatin celular të sekuestruar të Agasit janë gjetur me qindra telefonata mes tij dhe drejtueses së Shërbimit Informativ. Aty ka edhe foto dhe video që nuk përputhen me raportin e një bashkëpunëtori të thjeshtë. Sipas SPAK-ut, marrëdhënia shkon përtej këtij roli.

Ish-drejtoresha ka deklaruar se kontakti ka qenë vetëm telefonik. Ajo ka mohuar takimet fizike. Prokuroria, nga ana tjetër, dyshon të kundërtën, informon “Shqiptarja”.

Prokuroria e Posaçme e kishte dorëzuar prej 10 ditësh kërkesën për masë sigurie ndaj Hysenit në Gjykatën e Posaçme. Kërkesa u mbajt nga gjyqtarja e çështjes, e cila më pas mori vendimin. Gjykata verifikoi me kujdes çdo fakt. Vetëm pas këtij kontrolli e miratoi kërkesën e SPAK-ut.

Hyseni duhet të paraqitet në GJKKO brenda pesë ditëve nga njoftimi i vendimit. Ajo do të dalë bashkë me personat e tjerë ndaj të cilëve rëndon masë sigurie. Në gjykatë pritet të japë sqarime shtesë për akuzat e ngritura nga Prokuroria e Posaçme.

Ndërkohë GJKKO vendosi pezullimin e saj nga detyra dhe masën “arrest në shtëpi”. Masa u ekzekutua mbrëmë, pas vetëdorëzimit të saj në Kosovë. Kryeministri Edi Rama e shkarkoi nga Nju Jorku, ku ndodhet për vizitë, ndërsa Presidenti Bajram Begaj firmosi dekretin përkatës.