VIDEO/ Trajneri nuk e kishte në plan ta fuste! Armando Broja hyn dhe shpërthen pas 2 minutash, asisti i hequr në mënyrë fatale

Futje e detyruar, ndikim i menjëhershëm: Broja shkëlqen për dy minuta dhe i mohohet asisti

Armando Broja vazhdon të kalojë një moment të ndërlikuar te Burnley. Edhe pse mbeti jashtë grumbullimit të Shqipërisë, çka u pa si shans i artë për të fituar terren te klubi, sulmuesi nuk ka arritur ende të bindë trajnerin Hayen në stërvitje.

Gjatë pushimit për angazhimet e kombëtareve, Broja punoi në qendrën stërvitore së bashku me futbollistët e tjerë që nuk u ftuan nga përfaqësueset e tyre. Situata e tij nuk ndryshoi shumë. Dallimi i vetëm ishte ngjitja me një shkallë në hierarkinë e sulmit. Nga opsioni i katërt herën e shkuar, ai u rendit këtë herë si zgjedhja e tretë për Hayen.

Përballë Watfordit, Burnley e nisi titullar me Amdounin në majë. Pjesa e parë u mbyll 0-3 për miqtë. Amdouni konfirmoi formën e mirë të javëve të fundit dhe gjeti sërish rrugën e rrjetës. Megjithatë në preferencat e trajnerit, pas tij vjen Vardy dhe jo Broja. Edhe me rezultatin të sigurt në 0-3, Hayen zgjodhi ta hidhte në lojë pikërisht Vardyn në minutën e 65-të.

Ndeshja dukej e mbyllur. Por në të 84-ën, tekniku i Burnleyt u detyrua të bënte një zëvendësim tjetër. Mesfushori Alleyne u dëmtua dhe Broja u aktivizua, me skuadrën që kaloi në skemën 4-4-2. U deshën vetëm dy minuta. Sulmuesi shqiptar shpërtheu në krah, e la qartë pas me forcë fizike mbrojtësin kundërshtar dhe shërbeu saktë për Sapotaevin. Ky i fundit goditi drejt portës, por topi u devijua fatlumisht në këndore.

Asisti iu mohua Brojës për pak. Pikërisht nga ai kënd u shënua edhe goli i katërt i Burnleyt, me autor Edwards. Pak më vonë Vardy dërgoi topin në rrjetë me portën thuajse të zbrazët për realizimin e pestë, por goli u anulua. Mbetet për t'u parë nëse ky sinjal pozitiv do të peshojë te Hayen, i cili për momentin e konsideron Brojën si alternativën e tretë. /ABC24.AL/

https://sportekspres.com/wp-content/uploads/2026/10/tkjkdf.mp4