VIDEO/ Rama flet nga Rinasi: Rasti i Vlora Hysenit i ka lënë pa fjalë partnerët! SHISH u bë target thashethemesh

Edi Rama u kthye në vend përmes aeroportit "Nënë Tereza" në Rinas. Me të ishte edhe delegacioni që e shoqëroi gjatë qëndrimit gjashtëditor në Shtetet e Bashkuara. Atje ai mori pjesë në punimet e Asamblesë së Përgjithshme të OKB-së.

Menjëherë pas uljes, kreu i qeverisë doli për një prononcim. Ai tha se ngjarjet e fundit kërkojnë reagim të menjëhershëm. Fjala është për masën e arrestit në shtëpi ndaj ish-drejtueses së Shërbimit Informativ Shtetëror.

Rama theksoi se kjo dosje e ka kthyer SHISH-in në shënjestër të thashethemeve. Sipas tij, edhe partnerët ndërkombëtarë kanë mbetur të befasuar.

“Sapo jam kthyer nga New York ku siç e dini përfaqësova Shqipërinë në OKB. Vendosa të drejtohem menjëherë nga aeroporti ‘Nënë Tereza’. Zhvillimet e fundit, pas vendosjes së masës të arrestit shtëpie për ish-drejtuesen e SHISH, kërkojnë adresim të menjëhershëm dhe të drejtpërdrejtë. Ishte pa diskutim një masë ekstreme po të mbajmë parasysh se bëhet fjalë për ekspozimin e një institucioni shumë kyç. Unë s’kam të drejtën të ndërhyj në përmbajtjen e dosjes dhe çfarë e ka çuar gjykatën ta bëjë. S’e kam bërë më parë dhe as nuk do ta bëj. Çdo dyshim duhet të hetohet deri në fund. Çdo akuzë duhet të rrëzohet ose të provohet përmes një procesi të paanshëm”, tha Rama.

Prononcimi vjen ndërsa SPAK po heton ish-drejtoreshën e shkarkuar të SHISH-it, Vlora Hyseni. Ajo dyshohet se i ka kaluar informacion sekret biznesmenit Ergys Agasi. Ky i fundit është arrestuar në kuadër të dosjes “AKSHI”.