U gjobitën nga GJKKO për bojkotin, Haxhia: Do ankimojmë vendimin, i jemi drejtuar KLGJ-së

Kreu i Dhomës së Avokatisë Maks Haxhia doli sot, më 23 shtator, në një konferencë për mediat lidhur me gjobat e vendosura nga Gjykata e Posaçme ndaj avokatëve bojkotues.

Në fokus të takimit ishte reagimi i GJKKO-së pas bojkotit të seancave gjyqësore. Avokatët pezulluan pjesëmarrjen pasi hyri në fuqi rregullorja e re që ndalon mbajtjen e celularëve brenda sallave të gjyqit.

Haxhia bëri të ditur se Dhoma i është drejtuar zyrtarisht Këshillit të Lartë Gjyqësor për këtë çështje. Sipas tij, deri tani nuk ka ardhur asnjë përgjigje nga institucioni.

Ai paralajmëroi ankimimin e masave ndëshkimore. Gjithashtu siguroi anëtarët e Dhomës se barrën financiare do ta përballojë vetë organizata, edhe nëse gjobat lihen në fuqi.

"I jemi drejtuar edhe KLGJ-së për këtë problem dhe nuk ka pasur asnjë përgjigje. Ne duam që drejtësia të ecë përpara, që të zgjidhen problemet e individëve në Republikën e Shqipërisë. OSBE na ka dalë në mbrojtje. Edhe ndaj këtij reagimi, sërish nuk ka pasur një reagim nga ana e Gjykatës së Posaçme Antikorrupsion. Gjobat ne do i ankimojmë. Kemi vënë në dijeni të gjitha institucionet e drejtësisë për gjobat që na kanë vendosur. Nuk mund të prevalojë një rregullore, që nuk është për ne. Është një rregullore, që nuk përshtatet me ligjin. Edhe në rast se gjobat qëndrojnë, do i mbulojë Dhoma e Avokatisë. Ne do e ndjekim situatën nga ana ligjore", deklaroi Haxhia.

Sipas tij, për masat e marra janë informuar të gjitha institucionet e sistemit të drejtësisë. Ai e cilësoi rregulloren si të papërshtatshme dhe jo në përputhje me ligjin. Theksoi se ajo nuk mund të prevalojë mbi avokatët.

Bojkoti u pasua me gjoba nga ana e Gjykatës së Posaçme. Kjo u cilësua si hakmarrje për refuzimin e seancave.

Pavarësisht kundërshtimeve nga avokatët dhe shoqatat e gazetarëve, të cilat e konsiderojnë ndalimin e telefonave praktikë të gabuar, GJKKO ka bërë të qartë se do të vazhdojë ta zbatojë rregulloren.