Trump dhe Xi takohen në Shtëpinë e Bardhë – SHBA-ja dhe Kina kanë bërë përparime të mëdha

Presidenti amerikan, Donald Trump tha se Shtetet e Bashkuara dhe Kina kanë bërë “përparime të jashtëzakonshme” në çështjet që prekin të dyja vendet.

Duke folur gjatë takimit me presidentin kinez Xi Jinping në Shtëpinë e Bardhë, Trump tha se krijimi i një bordi tregtar pas luftës së tarifave mes dy vendeve është dëshmi se Uashingtoni dhe Pekini po punojnë për një marrëdhënie tregtare më të ekuilibruar.

Trump tha se gjatë bisedimeve me Xi-n do të diskutohen edhe çështje të rëndësishme që lidhen me sigurinë, teknologjinë dhe inteligjencën artificiale, të cilën ai e ka quajtur “superinteligjencë”.

Sipas presidentit amerikan, vendimet që dy vendet do të marrin për këto çështje mund të kontribuojnë në “promovimin e paqes për dekada dhe dekada në të ardhmen”.

Xi Jinping, nga ana tjetër, tha se ishte “shumë i lumtur” që po zhvillonte një vizitë shtetërore në Shtetet e Bashkuara. Ai falënderoi Trumpin dhe zonjën e parë Melania Trump për mikpritjen dhe uroi SHBA-në për 250-vjetorin e pavarësisë.

“Si Kina, ashtu edhe Shtetet e Bashkuara janë vende të mëdha, dhe popujt kinezë e amerikanë janë popuj të mëdhenj”, tha Xi.

Presidenti kinez tha gjithashtu se ai dhe Trumpi kanë ndërtuar një miqësi të bazuar në respektin e ndërsjellë dhe se mes tyre ekziston një “raport personal”.

Trump kujtoi takimet e tij të mëparshme me Xi-n në vende të ndryshme të botës, duke thënë se të dy kanë kaluar kohë së bashku nga Gjermania e Argjentina deri në Japoni, Korenë e Jugut dhe Kinë.

“Çuditërisht, kjo është hera e parë që takohemi së bashku këtu në Shtëpinë e Bardhë”, tha Trump, duke shtuar se shumë gjëra kanë ndryshuar që nga vizita e fundit e Xi-t në SHBA. /ABC24.AL/Trump dhe Xi takohen në Shtëpinë e Bardhë: “Kemi bërë përparime të jashtëzakonshme”. /ABC24.AL/