Tre punonjësit e plagosur nga shpërthimi në karburantin te “Brryli” dërgohen te Trauma, Ministria e Shëndetësisë zbulon si është gjendja e tyre

Ministria e Shëndetësisë publikoi të dhëna të reja rreth gjendjes së pacientëve të lënduar gjatë incidentit të mëngjesit në karburantin e zonës "Brryli". Shpërthimi la të plagosur tre punonjës.

Të gjithë të dëmtuarit u transportuan menjëherë në Spitalin Universitar të Traumës. Sipas raportimit zyrtar, ata tashmë gjenden në gjendje të stabilizuar dhe po marrin kujdesin e nevojshëm mjekësor.

"Tre personat e dëmtuar si pasojë e një shpërthimi të ndodhur në një karburant pranë zonës së 'Brrylit', Tiranë, janë paraqitur për trajtim mjekësor në Spitalin Universitar të Traumës. Pacientët V. H., R. A. dhe A. XH. ndodhen në gjendje shëndetësore të stabilizuar dhe janë nën kujdesin e ekipit mjekësor të Spitalit Universitar të Traumës. Aktualisht, po kryhen ekzaminimet e nevojshme dhe vlerësimi i mëtejshëm i gjendjes së tyre shëndetësore, në përputhje me protokollet mjekësore", njoftoi Ministria.