Trajneri i Spartakut të Moskës e pranon: Daku i pakënaqur me rolin

Sulmuesi shqiptar Mirlind Daku nuk është i kënaqur me hapësirën që ka aktualisht te Spartaku i Moskës dhe kërkon një rol më qendror në sulm. Këtë e ka konfirmuar vetë trajneri i klubit rus, Vadim Romanov.

Tekniku i Spartakur ka vlerësuar lartë cilësitë e 28-vjeçarit. Ai theksoi se skuadra kishte nevojë për një profil si Daku.

"Daku është një futbollist dhe golashënues shumë cilësor. Na duhej një lojtar i tillë, i uritur për gola, agresiv dhe, në njëfarë mënyre, egoist, që dëshiron të jetë gjithmonë më i rrezikshmi në fushë. Pres shumë prej tij. E shoh që në asnjë mënyrë nuk është i kënaqur me pozicionin e tij aktual. Ai do të bëjë gjithçka për të qenë numri një në sulm", u shpreh Romanov.

Pritshmëritë ndaj tij janë të mëdha. Trajneri beson se ambicia për të qenë lideri i repartit ofensiv do ta shtyjë sulmuesin të japë maksimumin.

Daku iu bashkua Spartakut pas një periudhe trevjeçare te Rubin Kazan. Aty u shpall golashënuesi më i mirë i ekipit në çdo sezon. Në total realizoi 35 gola në Premier Ligën ruse.

Edhe këtë edicion e nisi me gol. Në dy takimet e para të kampionatit, ende me fanellën e Rubin Kazanit, gjeti rrjetën dy herë.

Ndërkohë Spartaku po kalon një moment pozitiv. Pas nëntë javëve të para skuadra moskvite ka grumbulluar 19 pikë dhe mban vendin e dytë në klasifikim.