Tensionet në protestë, Macron paralajmëron protestuesit: Në Republikën tonë nuk ka vend për dhunë

Përplasje të ashpra shpërthyen të shtunën në Paris dhe në disa qytete të tjera të Francës. Rreth gjysmë milioni njerëz dolën në rrugë për të protestuar kundër rritjes së shpejtë të inflacionit. Policia u përball me turmat në disa pika.

Bilanci ishte i rëndë. Një protestuesi iu këput dora nga një shpërthim. U regjistruan disa vatra zjarri dhe dhjetëra dyqane u grabitën.

Trazirat vijnë pas disa javësh me protesta të studentëve. Ato po rrisin pasigurinë politike në vend. Franca hyn në një periudhë delikate, vetëm gjashtë muaj para zgjedhjeve për pasardhësin e presidentit Emmanuel Macron.

Macron reagoi vonë të shtunën me një mesazh në platformën X. “Në Republikën tonë nuk ka vend për dhunë. Ata që kanë shkatërruar, kanë sulmuar prefekturat dhe bizneset, madje kanë plaçkitur edhe bashkitë tona, do të ndiqen penalisht dhe do të ndëshkohen”, shkroi ai. “Shpreh mbështetjen e kombit për forcat e rendit, të cilat garantojnë të drejtën për të protestuar.”, shtoi presidenti.

Edhe kryeministri Sébastien Lecornu dënoi “dhunën me intensitet të jashtëzakonshëm”. Ai tha se tubimet paqësore janë legjitime në republikë, por jo dhuna. “Demonstratat paqësore kanë vendin e tyre të ligjshëm në Republikën tonë. Zjarrvëniet e qëllimshme, plaçkitjet dhe sulmet nuk kanë absolutisht vend. Sot, grupet e ekstremit të majtë kanë organizuar akte dhune në disa qytete franceze; atyre u janë bashkuar edhe persona me sjellje kriminale, të cilët janë përfshirë në plaçkitje dhe shkatërrime”, shkroi Lecornu në X.

Shifrat për pjesëmarrjen ndryshojnë. Ministria e Brendshme njoftoi rreth 550 mijë protestues në gjithë vendin dhe afro 400 të arrestuar. Ndërsa sindikata CGT raportoi një numër më të lartë, rreth 800 mijë pjesëmarrës.

Në terren situata u ashpërsua shpejt. Forcat e policisë hodhën gaz lotsjellës dhe përdorën topa uji ndaj demonstruesve me maska në Paris dhe gjetkë. Protestuesit hodhën sende të forta dhe fishekzjarrë drejt efektivëve. Në kryeqytet u dogjën disa makina të parkuara. Tymi u ngrit mbi qendër.

Në Saint-Étienne, në jug të vendit, një demonstruesi iu këput dora. Shpërthimi erdhi nga një granatë e policisë për shpërndarjen e turmës. Ngjarja kujtoi një rast tjetër të 5 tetorit. Atë ditë, në Lens në veri, një 15-vjeçari pësoi të njëjtin dëmtim nga shpërthimi i një granate trullosëse gjatë një proteste.

Sulme u shënuan edhe ndaj institucioneve. Në Lyon u dogj zyra e turizmit në qendër. Në Marseille dhe në Lille demonstruesit çanë hyrjet e godinave të bashkive. Në Bordeaux u sulmua një kompleks policor dhe ambientet u shkatërruan para se sulmuesit të largoheshin. Në Limoges flakët mbërritën deri në çati të bashkisë, pasi një grup sulmoi ndërtesën pas përfundimit të marshimit.

Plaçkitjet u shtrinë në disa qytete. Dyqane u grabitën në Paris, Marseille, Nice, Bordeaux dhe Lille. Në Lille u plaçkit edhe një dyqan i Apple.

Në Paris, më shumë se 300 persona tentuan të marshonin në bulevardin Champs-Élysées. Aty ndodhen dyqanet më të mëdha të markave luksoze. Policia u bllokoi rrugën me gaz lotsjellës. Ndërkohë turma thërriste “Të gjithë policët janë bastardë” (ACAB), një nga sloganet kryesore të kësaj vale protestash.