Të shtënat gjatë operacionit antidrogë në Krujë, Policia zbardh dinamikën: Një efektiv qëlloi në ajër për të…!

Drejtoria Vendore e Policisë Tiranë ka reaguar pas raportimeve për të shtëna me armë gjatë një operacioni antidrogë të zhvilluar të martën në Krujë.

Sipas uniformave blu, një efektiv ka qëlluar në ajër për të trembur kafshët e egra në pyll.

Ngjarja ndodhi rreth orës 11:30. Punonjësi ishte pjesë e një grupi kontrolli që po verifikonte një zonë të pyllëzuar dhe malore në Njësinë Administrative Cudhi. Për shkak të mungesës së sinjalit telefonik, ai nuk ka mundur të njoftojë grupet e tjera.

Kur dëgjuan krismat, efektivët e ekipeve të tjera dyshuan fillimisht se të shtënat vinin nga ndonjë person tjetër. Vetëm pas sqarimit të rrethanave u kuptua shkaku real i tyre.

Operacioni u organizua nga strukturat e DVP Tiranë në bashkëpunim me Forcën Kombëtare të Sigurisë dhe Agjencinë e Mbikëqyrjes Policore. Ai u zhvillua në zbatim të planit të masave për kontrollin e territorit. Qëllimi ishte parandalimi dhe goditja e tentativave për kultivim kanabisi në rrethin e Krujës. Për këtë arsye shërbimet u ndanë në disa grupe dhe u shpërndanë në zona të ndryshme. Deri tani janë gjetur dhe asgjësuar rreth 300 bimë kanabis.

Në njoftimin e saj Policia sqaron:

“Rreth orës 11:30, një punonjës policie, pjesë e një grupi kontrolli, në një zonë të pyllëzuar malore të Njësisë Administrative Cudhi, për të larguar rrezikun nga kafshët e egra të pyllit, ka qëlluar në ajër me armë zjarri. Në mungesë të valëve telefonike ka qenë i pamundur komunikimi me grupet e tjera të kontrollit dhe fillimisht, nga grupet e tjera, kur kanë dëgjuar të shtënat, është dyshuar se është qëlluar nga ndonjë person.

Me sqarimin e rastit dhe kryerjen e dokumentimit ligjor të rastit, shërbimet e Policisë vijojnë kontrollet në terren për evidentimin dhe goditjen e rasteve të kultivimit të bimëve narkotike. Deri në këto momente, janë konstatuar dhe asgjësuar rreth 300 bimë kanabis”.