“SPAK ka marrë rolin e portaleve”- Analisti Leka: Publikon mesazhe me histori rozë e denigruese! Pse nuk merret me çështje madhore si 21 Janari?

Analisti Arben Meçe e vlerësoi publikimin e fragmenteve nga dosja që rëndon mbi ish-kryetaren e SHISH-it si pjesë e një strategjie të konsoliduar. Sipas tij, Prokuroria e Posaçme e ka aplikuar të njëjtën metodë edhe në dosje të tjera.

Ai theksoi se shkëputja e pjesëve nga konteksti i plotë synon njollosjen e personave nën hetim. Kjo qasje, në gjykimin e tij, dëmton procesin dhe figurën e të hetuarve.

Për Meçen, SPAK duhet të reagojë në dy drejtime. Fillimisht të sqarojë publikisht nëse materialet e publikuara janë autentike apo jo. Më pas të nisë verifikimin për prokurorët që dyshohet se kanë nxjerrë sekretin hetimor në media.

“Është e njëjta strategji, që nuk e shoh vetëm sot. SPAK në 900 e ca regjistrime, nxjerr 5 denigruese, është strategji kjo. SPAK duhet të bëjë dy veprime. Së pari të dalë të përgënjeshtrojë se nuk janë të vërteta, së dyti të fillojë hetimin e dy prokurorëve, të cilët me zë dhe figurë nga gazetarët flasin që kanë nxjerrë sekretin. Goditje me strategji të qartë e SHISH në Republikën e Shqipërisë”, tha ai për ABC News.

Në të njëjtin diskutim në studio ndërhyri edhe analisti Martin Leka. Ai tha se institucioni po sillet si portalet kur nxjerr mesazhe me karakter rozë dhe denigrues. Leka kërkoi më shumë vëmendje te çështjet madhore.

“SPAK ka marrë rolin e portaleve apo algoritmeve, për të nxjerrë në skenë disa mesazhe me histori rozë. SPAK të japë përgjigje për 21 janarin”, u shpreh ai.