“SPAK godet figura të tjera për të arritur tek Agasi”, ish-ministri: Vendim me pasion politik, cilësoje tradhëti …

Yzeiraj: SPAK po godet figura të tjera për prova ndaj Agasit, vendim i nxituar me pasion politik

Ish-ministri i Brendshëm Bajram Yzeiraj ka reaguar për hetimin e SPAK ndaj ish-drejtores së SHISH, Vlora Hyseni. Kjo e fundit ndodhet aktualisht nën masën e sigurisë “arrest në shtëpi”.

Sipas Yzeirajt, mënyra e veprimit ka qenë e nxituar. Ai e cilësoi vendimin si të marrë me pasion politik. Në vlerësimin e tij duhej të ishin peshuar më mirë pasojat për shtetin dhe për vetë institucionin.

Ish-ministri u ndal edhe te përgjegjësia e kryeministrit. Nëse kreu i qeverisë nuk ka pasur dijeni për veprimet e pretenduara, atëherë nuk mund të mbahet përgjegjës, argumentoi ai.

Ai shtoi se Prokuroria zbaton Kodin e Procedurës Penale, por duhet të mbajë parasysh edhe politikën penale. Po ashtu theksoi nevojën për kujdes në raportet mes qeverisë dhe institucioneve të pavarura. Marrëdhëniet institucionale kërkojnë vëmendje, pa ndërhyrë në punën e njëra-tjetrës, dhe SPAK duhet të vlerësojë edhe interesin e shtetit, u shpreh ai.

Në prononcimin e tij Yzeiraj deklaroi:

“Procedura e ndjekur dhe mënyra e veprimit më duket pasionante, e nxituar, sepse nuk duhej menduar vetëm për këtë zyrtar. Ky rast mund të ishte zgjidhur ndryshe dhe dëmi që mund t’i bëhej institucionit mund të ishte më i ulët. Edhe reagimi i saj shfrytëzoi rastin për të dhënë një pëllëmbë të fortë. Në gjykimin tim, ishin të tëra mundësitë që dhe SPAK të kryente detyrën dhe shteti dhe institucioni, në imazhin e vet, të mos pësonte këto dëme.

Është një vendim i nxituar dhe me pasion politik. Sekreti shtetëror i ka të listuara dokumentacionet me akt ligjor dhe nënligjor. Deri tani s’ka sekret shtetëror fare, për sekretin e hetimit je ti që procedon. Edhe përkrahja pas kryerjes së krimit është vepër penale, por mund të ishte e zgjidhur ndryshe. A ka pasur dijeni kryeministri, nëse ka pasur dhe si ka dhënë zgjidhje, i ka bërë një dëm shtetit. Nëse s’ka pasur dijeni, s’mund ta bëj me faj.

Prokuroria ka Kodin e Procedurës Penale, por bën dhe politikë penale. Gjykata Kushtetuese me qeverinë nuk merret vesh, qeveria me këto institucione janë të pavarura, këto marrëdhënie institucionale pa u futur në marrëdhëniet e punës, me çfarë syri e sheh SPAK-u qeverinë. Duhet të mendosh dhe për shtetin. Ato dy vepra janë kundërvajtje penale, thuaje tradhti kombëtare. Mos e përdor këtë masë sigurie që të përdorësh prova për Agasin, duke goditur figura të tjera; përdor prova për Agasin.”