Situatë kritike në Fier, ndërhyrje edhe në Dajt, shuhet vatra në Zall Herr. Ministri Nufi: FA në gatishmëri të plotë

Ministri i Mbrojtjes, Ermal Nufi, ka bërë të ditur situatën e rënduar nga zjarret në disa pjesë të vendit, duke konfirmuar se Forcat e Armatosura janë angazhuar maksimalisht në shuarjen dhe kontrollin e flakëve. Puna në terren vazhdon pa ndërprerje.

Në zonën më të prekur, Drizë-Radostinë të Fierit, flakët kanë çuar në evakuimin e menjëhershëm të 10 familjeve. Për përballimin e situatës, janë dërguar 55 ushtarë dhe dy helikopterë të Forcës Ajrore.

“Trupat tona punojnë ditë e natë për të garantuar sigurinë e popullsisë dhe pronave të tyre,” theksoi ministri Nufi.

Njëkohësisht, vatra të tjera janë identifikuar në Lezhë, ku po ndërhyrjet me 80 efektivë dhe një helikopter. Zjarri në zonën e Ungrejt vijon të jetë aktiv.

Përreth Tiranës, vatra në Dajt është ende aktive. Operacioni aty përfshin 30 ushtarë dhe mbështetje ajrore. Ndërsa, në fshatin Qinam të Zall-Herrit, flakët janë shuar plotësisht pas ndërhyrjes së pesë automjeteve zjarrfikëse dhe një helikopteri.

Në Mallunxë të Matit, ku ishte shfaqur rreziku, situata është vënë nën kontroll. Atje janë angazhuar 30 efektivë dhe një mjet zjarrfikës. Autoritetet bëjnë me dije se për momentin nuk ekziston asnjë rrezik për banesat.

Sipas njoftimit zyrtar nga Ministria e Mbrojtjes, të gjitha format e Forcave të Armatosura mbeten në dispozicion total. Ato do të vijojnë të ndërhyjnë menjëherë në çdo pikë ku situata e kërkon. Monitorimi i terrenit vazhdon pa ndalesë.