Si ta bëni më të lehtë për macen tuaj të humbasë peshë, gjë që është thelbësore për shëndetin e saj

Mbipesha mbetet çrregullimi ushqimor më i shpeshtë te macet që jetojnë në shtëpi, edhe pse në pjesën më të madhe të rasteve mund të shmanget. Kur pesha qëndron brenda normave, kafsha është më e lumtur dhe ka më shumë gjasa të jetojë më gjatë.

Kilet e tepërta ulin ndjeshëm cilësinë e jetesës. Macet që peshojnë më shumë se ç'duhet priren të lëvizin më pak me pronarët, të shfaqin më pak energji dhe dëshirë për lojë, si dhe të bien më shpejt në gjendje plogështie.

Përveç kësaj, ato ekspozohen ndaj rrezikut më të lartë për të zhvilluar probleme të ndryshme shëndetësore. Pikërisht për këtë arsye, para se të nisë çdo përpjekje për dobësim, është thelbësore të kuptohet nëse shtimi në peshë vjen nga një shkak mjekësor.

Nuk ekziston një formulë e shpejtë për rënien e sigurt nga pesha. Qasja e duhur kërkon ndryshime të qëndrueshme në rutinën e përditshme brenda shtëpisë, të menduara për t'i ardhur në ndihmë kafshës në afat të gjatë.

Hapi i parë dhe më i rëndësishëm është kontrolli shëndetësor. Veterineri duhet të përjashtojë çdo problem që mund të nxisë shtimin e kileve. Nëse nuk e keni vërejtur vetë shtimin në peshë, mos u ndjeni keq kur mjeku, gjatë vizitës vjetore, ju thotë se macja do të përfitonte duke humbur pak peshë.

Vëmendje meriton edhe ushqimi që blihet pa recetë. Jo të gjitha produktet kanë të njëjtën cilësi. Disa përmbajnë sheqerna të shtuar që nuk nevojiten, të tjera kanë nivel të lartë yndyre.

Ushqimi i lagësht, në kanaçe, zakonisht sjell më pak kalori sesa ai i thatë. Ka më shumë ujë në përbërje, tretet më lehtë dhe pëlqehet nga një pjesë e madhe e maceve. Prandaj këshillohet të shihni me kujdes se çfarë konsumon aktualisht macja juaj dhe, nëse menuja nuk rezulton aq e shëndetshme sa dukej, ta zëvendësoni dalëngadalë.

Përkrah llogaritjes së kalorive dhe zgjedhjes së ushqimit cilësor, lëvizja e përditshme luan rol kyç për mbajtjen e peshës në nivele optimale, shkruan The Spruce Pets.

Ekspertët sugjerojnë të mbani shënime të rregullta për sasinë e ushqimit, aktivitetin fizik dhe peshën javore. Matja duhet bërë çdo javë, po në të njëjtën peshore dhe në të njëjtin orar. Çdo ndryshim kërkon gradualitet dhe ritëm që i përshtatet kafshës. Kur racioni pakësohet, macja mund të protestojë. Ajo ndonjëherë kërkon vëmendje me sjellje të ndryshme për të marrë ushqim shtesë.