Shuhet zjarri masiv tek Gjiri i Lalzit, Sako: Ndihmuan dhjetëra zjarrfikëse, s’u dëmtua asnjë hotel

Zjarri masiv në Gjirin e Lalzit u shua, flakët aktive vetëm në kodrat pyjore

Vatra e madhe e zjarrit në Gjirin e Lalzit u shua sot, më 23 shtator. Flakët vijojnë ende në zonën kodrinore të pyllëzuar, ku ndërhyrja mbetet e vështirë.

Lajmin e konfirmoi kryetarja e Bashkisë së Durrësit, Emirjana Sako. Sipas saj, dhjetëra zjarrfikës, 95 forca të armatosura dhe 11 mjete kanë punuar pa ndërprerje gjatë natës në terren.

Operacioni u përqendrua në izolimin e vatrave dhe ndalimin e përhapjes së zjarrit në Shën Pjetër. Falë angazhimit në terren, nuk është shënuar asnjë dëm në hotele, resorte apo banesa të zonës.

Situata në kodra mbetet më komplekse për shkak të terrenit të thyer. Për këtë arsye në operacion është përfshirë edhe një helikopter, i cili po ndërhyn nga ajri.

“Aktualisht, zjarri vijon në zonën e pyllëzuar kodrinore, ku terreni është i vështirë ndaj në operacionin e shuarjes është angazhuar edhe një helikopter, i cili po vijon ndërhyrjen nga ajri”, u shpreh kryebashkiakja.

Sako shprehu mirënjohje për zjarrfikësit, forcat e këmbësorisë dhe ekipet e emergjencave që punuan pa pushim. Ajo theksoi se puna e tyre ishte vendimtare për mbrojtjen e banorëve dhe pronave në zonë.