Shtetet anëtare të OBSh-së angazhohen për të mbrojtur sigurinë dhe ndjekjen së bashku të zhvillimit!

**Dushanbe pret mbledhjen e 25-të të krerëve të qeverive të OBSh-së**

Në Dushanbe, kryeqyteti i Taxhikistanit, u zhvillua mbledhja e 25-të e Këshillit të Krerëve të Qeverive (Kryeministrave) të vendeve anëtare të Organizatës së Bashkëpunimit të Shangait.

Punimet u drejtuan nga kryeministri i Taxhikistanit. Në takim morën pjesë udhëheqës e përfaqësues të shteteve anëtare, të ftuar nga vendi pritës, si dhe drejtues të organizatave ndërkombëtare përkatëse.

Sipas pjesëmarrësve, 25 vjet pas themelimit OBSh-ja është rritur dhe konsoliduar vazhdimisht, ndërsa pesha e saj në arenën ndërkombëtare shtohet vit pas viti. Ata nënvizuan domosdoshmërinë e zbatimit të rezultateve të samiteve të Tianjin-it dhe të Bishkek-ut. Kërkohet gjithashtu forcimi i “Frymës së Shangait”, përmirësimi i komunikimit dhe i koordinimit, si dhe nxitja e një zhvillimi me cilësi të lartë të këtij mekanizmi. Kështu organizata do të jepte kontribut më të madh për paqen dhe zhvillimin në rajon e në botë.

Kryeministri kinez Li Qiang, duke marrë fjalën, kujtoi se këtë vit mbushen 25 vjet nga themelimi i OBSh-së. Sipas tij, edhe pse në skenën ndërkombëtare përplasen ideologji e rryma të ndryshme mendimi, drejtimi kryesor mbetet ai i një bote shumëpolare dhe i globalizimit ekonomik. OBSh-ja duhet të vijojë të mbështesë “Frymën e Shangait”, me angazhim jo vetëm për stabilitetin dhe lulëzimin e rajonit, por edhe për zhvillimin e përbashkët të botës.

Kjo kërkon këmbëngulje ndaj synimeve afatgjata. Vendet anëtare ndajnë të njëjtin aspiratë: të nxisin miqësinë, të mbrojnë sigurinë dhe të ndjekin së bashku zhvillimin. Ato duhet të mbeten të palëkundura, të bashkuara ngushtë dhe të ecin përpara me guxim.

Në praktikë, vijoi Li, duhen forcuar koordinimi dhe inovacioni pragmatik. Kina është e gatshme të punojë krah për krah me vendet e tjera anëtare për të rritur efikasitetin funksional të organizatës. Synohet gjithashtu konsolidimi dhe forcimi i projekteve të bashkëpunimit, si dhe shfrytëzimi i rolit shembullor të tyre për një zhvillim më cilësor brenda OBSh-së. Pala kineze do të koordinohet me të gjitha palët për të finalizuar kuadrin institucional të “katër qendrave të sigurisë”. Ajo do të financojë edhe trajnime në Kinë për 1 000 punonjës mjekësorë nga shtetet anëtare, duke shtuar mirëqenien e popujve të rajonit.

Në përfundim të punimeve, drejtuesit firmosën dhe publikuan një komunikatë të përbashkët. Ata miratuan edhe dokumente bashkëpunimi për tregtinë dhe investimet, për industrinë e lidhshmërisë, si dhe rezoluta për zhvillimin e organizatës.