Shqipëria mbyll negociatat për kapitullin 20 të BE-së, ja sfidat që e presin deri në vitin 2027

Shqipëria ka përmbyllur me sukses negociatat për një tjetër kapitull të rëndësishëm të legjislacionit evropian. Bëhet fjalë për Kapitullin 20, i cili mbulon ndërmarrjet dhe politikën industriale.

Vlerësimi i Brukselit konfirmon se vendi ka përafruar standardet dhe ka harmonizuar tërësisht kuadrin ligjor me atë të Bashkimit Evropian në këtë fushë. Gjithashtu, të gjitha reformat e kërkuara nga Unioni për këtë kapitull janë përmbushur.

Kryeministri Edi Rama e cilësoi dritën jeshile nga BE-ja për Kapitullin 20 si një hap që forcon perspektivën ekonomike të vendit. Sipas tij, mbyllja e negociatave krijon më shumë mundësi për investime, inovacion, rritje të konkurrueshmërisë dhe punësim.

Një tjetër moment i rëndësishëm u shënua në korrik të këtij viti. Në përfundim të Konferencës së IX Ndërqeveritare Shqipëri-Bashkimi Evropian u zyrtarizua mbyllja e përkohshme e tre kapitujve të tjerë. Ata janë Kapitulli 25 “Shkenca dhe Kërkimi”, Kapitulli 26 “Arsimi dhe Kultura” dhe Kapitulli 30 “Marrëdhëniet me Jashtë”.

Me kapitullin e ri të shtuar, numri i dosjeve të mbyllura shkon në katër. Shqipërisë i mbeten edhe 29 kapituj për t’u negociuar dhe mbyllur. Afati i dakordësuar mes Tiranës dhe Brukselit për përmbylljen e të gjithë procesit është viti 2027.

Mbyllja e këtyre kapitujve të parë ishte e pritshme. Ata kanë volum më të vogël legjislacioni për t’u përafruar, prandaj ecuria ka qenë më e shpejtë. Dosjet më të vështira vlerësohen drejtësia, bujqësia, siguria ushqimore dhe mjedisi. Ndërkohë, edhe tregu i brendshëm kërkon punë të konsiderueshme për përafrimin dhe zbatimin e rregullave evropiane, pasi përfshin numrin më të madh të kapitujve.

Grupkapitulli 1 “Themelorët” mbetet sfida më e madhe. Ai përfshin pesë kapituj që lidhen me gjyqësorin, të drejtat themelore, statistikat, prokurimin publik, kontrollin financiar, drejtësinë, lirinë dhe sigurinë. Pikërisht për nivelin e vështirësisë, ky grup hapet i pari dhe mbyllet i fundit gjatë negociatave.

Autoritetet shqiptare pritet të vijojnë reformat për përafrimin me standardet evropiane. Qëllimi është forcimi i institucioneve dhe përgatitja e vendit për të marrë përsipër përgjegjësitë që vijnë me anëtarësimin, deri në mbylljen e plotë të negociatave për të gjithë kapitujt.