Shpërthimi në pikën e karburantit te “Brryli”, 4 persona shoqërohen në Polici! Mes tyre administratori, menaxheri, punonjësit dhe shoferi i makinës

Hetimet për shpërthimin në pikën e karburantit EIDA në zonën e Brrylit në Tiranë çuan në shoqërimin e katër personave në Polici. Mes të shoqëruarve për pyetje janë administratori dhe menaxheri i subjektit, disa punonjës të shërbimit, si dhe shoferi i makinës nga nisi ndezja. Po ashtu u morën në pyetje edhe disa dëshmitarë të pranishëm aty në momentin e ngjarjes.

Autoritetet shprehen se do të thellohen hetimet për të përcaktuar përgjegjësitë konkrete. Në vijim pritet të shoqërohen në polici edhe inxhinieri dhe drejtuesi teknik i pikës karburantit. Dëshmitë e tyre do të ndihmojnë për të verifikuar nëse u ndoqën protokollet e sigurisë dhe normat teknike gjatë operimit.

Ngjarja, sipas burimeve policore, rezultoi me plagosjen e tre punonjësve. Për pasojë, u shkaktuan edhe dëme të konsiderueshme materiale në ambientet e stacionit të karburantit.

Sipas të dhënave paraprake, dyshimi kryesor është se shpërthimi ndodhi gjatë furnizimit me karburant të një automjeti. Paralelisht, në ato ambiente kishte pasur një rrjedhje të gazit, e cila konsiderohet faktor shkaktar.

Tre punonjësit e lënduar u transportuan menjëherë në Spitalin Universitar të Traumës. Sipas informacionit zyrtar nga Ministria e Shëndetësisë, gjendja shëndetësore e tyre është e stabilizuar dhe ata ndodhen jashtë rrezikut për jetën.