Shkodër, arrestohet 23-vjeçari për transport ilegal emigrantësh drejt Malit të Zi

Një tjetër rast i ndihmës për kalim të paligjshëm të kufirit është goditur në Shkodër. Policia e Kufirit dhe Migracionit finalizoi operacionin e koduar "Transit 4".

Në pranga ra një 23-vjeçar. Bëhet fjalë për shtetasin me iniciale L. M., banues në Urën Vajgurore.

Ai u kap në flagrancë nga shërbimet e Drejtorisë Vendore për Kufirin dhe Migracionin Shkodër. Sipas policisë, i riu po transportonte me automjet shtatë emigrantë nga vendet e treta.

Bëhet fjalë për pesë shtetas nga Filipinet dhe dy nga Afganistani. Grupi synonte të kalonte ilegalisht kufirin shtetëror drejt Malit të Zi. Transporti dyshohet se bëhej kundrejt pagesës.

Ndalimi u krye në aksin rrugor Vukpalaj - Aliaj. Aty u ndalua automjeti që drejtohej nga 23-vjeçari. Mjeti me të cilin po lëviznin emigrantët u sekuestrua si provë materiale.

Operacioni erdhi pas kontrolleve intensive në terren. Qëllimi ishte parandalimi dhe goditja e veprimtarisë kriminale të ndihmës për kalim të paligjshëm të kufirit. Burime zyrtare bëjnë me dije se u shfrytëzuan edhe informacione të siguruara në rrugë operative.

Ndërkohë materialet procedurale janë dërguar për ndjekje të mëtejshme. Ato iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër.