“S’është vetëm problem shqiptar!”- Rama prezanton 6 pikat e Programit Kombëtar të Strehimit: Banesa sociale edhe nga konfiskimet, mbështetje familjeve të reja

Programi i ri Kombëtar i Strehimit, i prezantuar sot nga qeveria, nuk paraqet vetëm një paketë financiare, por sipas kryeministrit Edi Rama, përbën thelbin e një reforme strukturore rrënjësore në fushën e strehimit në Shqipëri.

Kryeministri Rama e theksoi se objektivi kryesor është ndryshimi i plotë i qasjes ndaj strehimit, një çështje që po bëhet gjithnjë e më kritike për familjet e reja dhe të rinjtë që kërkojnë të kenë shtëpinë e tyre. "Kjo nuk është vetëm një problem shqiptar, por një problem i madh europian," nënvizoi ai.

Baza e reformës qëndron në gjashtë programe të reja specifike. Njëri prej tyre është ai i banesave sociale me qira, që do të funksionojë sipas një modeli të ri. Sipas kryeministrit, furnizimi me këto banesa nuk do të varet vetëm nga ndërtimet e reja. Do të përdoren gjithashtu blerje të drejtpërdrejta në treg, përshtatja e godinave shtetërore apo të atyre të konfiskuara, si dhe mekanizma si bonusi i qirasë dhe partneriteti publik-privat.

"Programi i dhënies së banesave sociale me qira do të jetë më kompleks, jo thjesht duke pritur ndërtimin dhe më pas seleksionimin, që dihet si përfundon," shpjegoi Rama. "Do të parashikojë ndërtime të reja, blerje të drejtpërdrejta nga tregu, përshtatje objektesh shtetërore ose të konfiskuara. Kemi konfiskuar jo pak dhe do të vazhdojmë të konfiskojmë çdo objekt që shkel rregullat e lejes së ndërtimit. Gjithashtu do të përfshihet bonusi i qirasë dhe partneriteti publik-privat, pra të gjitha instrumentat për të garantuar një ofertë të gjerë."

Përveç këtij programi, ekzistojnë edhe pesë të tjerë. Njëri parashikon banesa me kosto të ulët, ku shteti do të subvencionojë kreditë për blerjen e tyre. Një tjetër program do të fokusohet në përmirësimin e banesave ekzistuese për grupe të cenueshme, investime në zona informale dhe përshtatjen e ndërtesave për t'i shndërruar në banesa sociale.

Kryeministri sqaroi vizionin social të kësaj reforme. "Nuk duam vetëm blloqe banimi për njerëz të varfër, por lagje dinjitoze për të gjitha shtresat e shoqërisë," u shpreh ai. "Ata me nevojë më të madhe do të mbështeten fort, ndërsa ata me mundësi do të blejnë. Cilësia është e rëndësishme për këdo."

Për ta mbështetur këtë reformë, do të ketë edhe një riorganizim institucional. Agjencia e Planifikimit të Territorit, Agjencia e Zhvillimit të Territorit, Enti Kombëtar i Banesave dhe bashkitë do të integrohen në një sistem të vetëm të koordinuar.

Zbatimi do të nisë fillimisht në Tiranë, ndërsa bashkitë e tjera janë ftuar të paraqesin propozimet e tyre, pasi zona të tjera po shqyrtohen gjithashtu.

Një program i veçantë është parashikuar për situatat e emergjencës. Ai par krijimin e banesave të përkohshme për familjet e prekura nga fatkeqësitë natyrore, si përmbytjet ose zjarret. Rama theksoi rëndësinë e përgatitjes. "Duhet të kemi një sistem mikpritjeje të përkohshëm për njerëzit e prekur, ndërsa forcojmë kapacitetet logjistike për t'u përballur me fatkeqësitë në kohë reale," tha ai.

Gjithashtu, programi i gjashtë do të fokusohet në ndërtimin e banesave të përshtatura posaçërisht për familjet me persona me aftësi të kufizuara, duke u garantuar kushte jetese dinjitoze dhe të përshtatshme.