Rusia sulmon ashpër Kievin, dëgjohen shpërthime – raportohen edhe për viktima

Rusia ka kryer një sulm masiv me raketa balistike ndaj Kievit, ku kanë humbur jetën të paktën tre persona dhe 22 të tjerë janë plagosur.

Një pjesë e një lagjeje banimi është dëmtuar rëndë, ndërsa në shënjestër të sulmit ishin edhe disa objekte të infrastrukturës energjetike në kryeqytetin ukrainas, raporton Kyiv Independent.

Shpërthimet e para u dëgjuan vonë në mbrëmje. Kryetari i Kievit, Vitali Klitschko, njoftoi se një raketë ruse goditi pothuajse pa paralajmërim një ndërtesë nëntëkatëshe në distriktin Desnianski, duke shkaktuar një zjarr të madh.

Nga ky sulm, të paktën dy persona humbën jetën dhe 21 të tjerë u plagosën. Klitschko tha se 16 të plagosur u dërguan në spital, ndërsa katër prej tyre ishin në gjendje të rëndë.

Valë të reja sulmesh pasuan mes orës 04:45 dhe 06:45, kur në qytet u dëgjuan më shumë se dhjetë shpërthime. Rreth orës 05:30 u raportuan ndërprerje të shkurtra të furnizimit me energji elektrike.

Pas sulmeve të reja, Klitschko njoftoi se një person tjetër nga distrikti Darnyts’kyi ishte shtruar në spital, ndërsa një person kishte humbur jetën në distriktin Holosiivskyi.

Një zyrtar i paidentifikuar i sektorit energjetik konfirmoi se disa centrale elektrike ishin vënë në shënjestër. Edhe kryetari i Kievit tha se ishin goditur disa objekte energjetike. Autoritetet ende nuk kanë publikuar detaje të plota për dëmet.

Sulmet ndaj infrastrukturës energjetike ndodhën vetëm disa ditë pasi presidenti amerikan, Donald Trump, i kërkoi Ukrainës të ndalojë sulmet ndaj objekteve ruse të naftës. Trump pretendoi se këto sulme po kontribuojnë në rritjen e çmimeve të naftës, të cilat lidhen edhe me luftën e SHBA-së në Iran.

Presidenti ukrainas, Volodymyr Zelensky, u përgjigj se është i gatshëm të respektojë një armëpushim që përfshin infrastrukturën energjetike, nëse Rusia ndalon sulmet ndaj rrjetit energjetik të Ukrainës. /ABC24.AL/