Rrëzohet aeroplani bombardues rus – humbin jetën gjashtë anëtarë të ekuipazhit

Rrëzohet bombarduesi rus Tu-95 në Amur, humbin jetën gjashtë anëtarë të ekuipazhit

Gjashtë ushtarakë humbën jetën pasi një bombardues strategjik rus u rrëzua në lindje të vendit. Vetëm një anëtar i ekuipazhit arriti të mbijetojë.

Incidenti ndodhi më 29 shtator, kur avioni i tipit Tu-95 ra në një zonë të pabanuar të rajonit Amur. Fluturimi, sipas të dhënave fillestare, ishte i rregullt dhe pa ngarkesë armatimi.

Ministria ruse e Mbrojtjes konfirmoi bilancin dhe njoftoi se i mbijetuari është i lënduar. Ai po merr trajtim mjekësor në spital.

Një delegacion ushtarak është nisur drejt vendit të ngjarjes për të hetuar shkaqet e rrëzimit.

Ngjarja vjen pas disa incidenteve të tjera në aviacionin ushtarak rus gjatë këtij viti. Në qershor, një bombardues Tu-22M3 u rrëzua në rajonin e Irkutskut në Siberi gjatë një fluturimi stërvitor, por ekuipazhi u katapultua dhe shpëtoi.

Më i rëndë ishte aksidenti i 31 marsit në Krime, ku një avion transportues An-26 u përplas me një shkëmb. Sipas dyshimeve paraprake, shkak u bë një defekt teknik. Në atë rast humbën jetën 29 persona.