Riaktivizohet zjarri në Çërrilë të Mallakastrës, flakët po përhapen me shpejtësi

Zjarri është shfaqur sërish në pyjet e Çërrilës në Mallakastër, duke u përhapur me ritme të shpejta falë terrenit të thepisur dhe pemëve të thata. Kushtet e motit kanë ndihmuar që flakët të kapin një sipërfaqe të konsiderueshme me pisha.

Për të luftuar gjigantin e kuq janë angazhuar katër automjete zjarrfikëse, tridhjetë ushtarë dhe njëzet punonjës të bashkisë. Për shkak të relievit të thyer, puna e tyre po vështirësohet. Në mbështetje të tyre ka mbërritur edhe një helikopter. Deri më tani, flakët kanë mbetur larg zoneve të banuara.

Ky është një tjetër sezon i vështirë veror për Shqipërinë, i stigmatizuar nga zjarret. Fushë-Kruja, Himara, Fieri, Puka, Lura dhe rrethinat e Tiranës janë ndër rajonet më të prekura nga flakët. Deri tani nuk raportohet për jetë të humbura. Megjithatë, janë djegur banesa dhe janë shkrumbuar sipërfaqe të mëdha pyjore dhe bujqësore.