Referendumi në Islandë për hyrjen në BE, Ministria e Jashtme: Pozitiv, mund të krijojë moment politik edhe për Shqipërinë!

Qytetarët islandezë do të votojnë gjatë fundjavës së fundit të gushtit, më 29 shtator. Në këtë referendum ata do të shprehen nëse duan që vendi i tyre të rikthehet në tryezën e bisedimeve për aderim në Unionin Europian.

Parashikimet tregojnë për një rezultat të ngushtë. Sondazhet e fundit zbulojnë një popullsi thellësisht të ndarë mbi këtë çështje jetike. Është e rëndësishme të theksohet se ky votim nuk vendos drejtpërdrejtë nëse Islanda do t'i bashkohet bllokut me 27 shtete. Ai përcakton nëse duhet rifilluar dialogu zyrtar për anëtarësim.

Megjithatë, një shumicë "pro" konsiderohet se do të ndryshonte rrënjësisht ritmin e dinamikën e gjithë procesit të zgjerimit të BE-së.

Mes vendeve që aktualisht udhëheqin negociatat e anëtarësimit janë Mali i Zi dhe Shqipëria. Përfundimi i suksesshëm i një referendumi në Islandë do t'i vendoste këto dy shtete në një garë të re e më direkte. Si në Tiranë ashtu edhe në Podgoricë, ky zhvillim shihet me optimizëm. Konsiderohet si një shenjë e fortë se sa më i gjerë të jetë mbështetja europiane për zgjerimin, aq më favorizues bëhet klima politike për të gjitha kombet kandidate. Kjo vlen edhe për kombet që kanë hedhur hapa të rëndësishme në këtë rrugëtim, Shqipëria përfshirë.

“Ne nuk e shohim procesin e zgjerimit si një lojë me rezultat zero, ku përparimi i një vendi përbën humbje për një vend tjetër. Përkundrazi, një rezultat pozitiv në Islandë mund të krijojë një moment të ri politik në nivel europian për debatin mbi zgjerimin dhe të forcojë bindjen se Bashkimi Europian mbetet projekti më i suksesshëm politik, ekonomik dhe gjeopolitik në kontinen”, është shprehur Ministria e Punëve të Jashtme e Shqipërisë për Radion Europa e Lirë.