Rasti i Vlora Hysenit, Balla: Nuk i komentoj dosjet nën hetim, PS nuk bëhet avokate e askujt

Kreu i Grupit Parlamentar socialist, Taulant Balla, deklaroi se nuk komenton dosje që janë në duart e SPAK-ut.

I pyetur për masën e arrestit ndaj ish-drejtueses së SHISH-it, Vlora Hysenit, ai mbajti një qëndrim të prerë. Partia Socialiste nuk është dhe nuk do të bëhet avokate e askujt, theksoi ai.

“Unë bëj pjesë në ata që nuk i komentojnë dosjet e SPAK, nuk kam komentuar as dosjet ku kam bërë akuzë unë, rasti i Sali Berishës dhe s’kam komentuar asnjëherë përmbajtje të dosjes. Me vendim gjykate, tanimë jemi të ndaluar për të komentuar mbi copëza bisedash.

Janë dy standarde që ky grup parlamentar, mazhorancë, shumicë, i ka përcaktuar. Ne nuk hyjmë në meritën e dosjeve, nuk komentojmë përmbajtjen e dosjeve dhe çdo zyrtar duhet ta kontestojë kufizimin e lirisë të të gjitha formave në gjykatë. PS nuk është avokate mbrojtëse e askujt.

Në rastin e personave me mandat parlamentar, Kuvendi i Shqipërisë përmes së drejtës që i ka dhënë sovrani, e ka ushtruar këtë të drejtë dhe dua të rishpreh që Shqipëria sa i përket pjesës që lidhet me kufizimet e lirisë para vendimit të gjykatës, duhet t’i japë fund kësaj praktike.”, u shpreh Balla.

Sipas tij, ky është parimi i ndjekur nga mazhoranca. Grupi parlamentar nuk futet në themelin e çështjeve dhe nuk diskuton përmbajtjen e tyre.

Çdo zyrtar, shtoi Balla, duhet ta kundërshtojë në gjykatë çdo formë të kufizimit të lirisë. Qëndrimi ishte i qartë.

Për rastet e personave me mandat deputeti, ai kujtoi se Kuvendi e ka ushtruar të drejtën që buron nga sovrani. Ndërkohë theksoi se praktika e kufizimeve të lirisë para një vendimi përfundimtar të gjykatës duhet të marrë fund në Shqipëri.