“Rama” ndez debatet edhe te Kultura, Zhupa përmend dosjet e SPAK dhe librin e arkitektëve, socialistët reagojnë: E dinim se do vije kasetën…

Debatet për Ramën zhvendosen edhe në Komisionin e Kulturës, Zhupa përmend dosjet e SPAK-ut dhe librin e arkitektëve, socialistët kundërpërgjigjen

Figura dhe axhenda e kryeministrit Edi Rama dominuan edhe sot punimet në Komisionin e Kulturës.

Edhe pse në rend dite ishte një çështje tjetër, diskutimi u kthye sërish te zhvillimet e fundit politike. Kryetarja Ina Zhupa e lidhi debatin me praninë e kreut të qeverisë në Samitin e Turizmit në Bruksel. Ai aktivitet ishte mbajtur një ditë më parë.

“Pashë një kryeministër që me trup ishte para gazetares, por me mendje ishte duke lexuar dosjet e SPAK-ut sa herë i ka dalë emri, sa herë përflitet për takimet e tij dhe mesazhet me Vlora Hysenin, Ergys Agasin, me të gjithë grupin e strukturuar kriminal”, tha Ina Zhupa.

Në sallë ajo u shfaq e përgatitur. Me vete kishte sjellë botimin e njohur “Albanian Files” (Dosjet Shqiptare), që përmbledh idetë e projekteve të arkitektëve të huaj. Për këtë libër PD ka dorëzuar kallëzim në SPAK.

“Mendova se do e kishte marrë me vete librin te strategjia e turizmit, por ka frikë se është dosje SPAK-u. I rëndonte ndërgjegjen po ta mbante në dorë”, tha Ina Zhupa.

Replika erdhi nga nënkryetari Erion Malaj dhe deputetë të tjerë socialistë.

“Nuk e vija në diskutim që ju do vendosnit kasetën, përsërisni të njëjtat gjëra. Por ju them se unë nuk përfaqësoj 800 mijë shqiptarë që votuan PS. Kjo narrativë se kryeministri nuk është në lartësinë e duhur për të përfaqësuar Shqipërinë në një event turizmi, nuk qëndron”, tha Erion Malaj.

Në të njëjtën linjë foli edhe Briseida Çakërri.

“Mos na e qani hallin ne, ne jemi këtu për Shqipërinë dhe shqiptarët”, tha Briseida Çakërri.

Me metaforë iu përgjigj kritikave të opozitës deputeti shkrimtar Loer Kume.

“Sot kanë dritën e skenës dy entitete, i pari është drejtësia që vazhdon punën e saj, i dyti, shkrimtarët që ndahen në shkrimtarët të vegjël, të mesëm dhe të mëdhenj që merren me idetë e të nesërmes”, tha Loer Kume.

Kryetarja Zhupa reagoi pa vonesë.

“Ka dy lloj politikanësh. Mediokër që mendojnë për zgjedhjet e radhës dhe ka politikanë të mëdhenj që mendojnë për gjeneratat e radhës”, tha Ina Zhupa.

Pas 30 minutash debat, Komisioni iu rikthye rendit të ditës. Vijoi shqyrtimi i projektligjit për të drejtat e autorit.