Rama kthehet nga SHBA, shkëmbehet me Berishën në Rinas. Kreu i PD udhëton drejt Strasburgut

Kryeministri Edi Rama është rikthyer në Tiranë pas vizitës zyrtare në Shtetet e Bashkuara.

Shefi i qeverisë ishte në Nju Jork për të marrë pjesë në punimet e Asamblesë së Përgjithshme të Kombeve të Bashkuara. Ai zbriti në kryeqytet mesditën e sotme.

Pikërisht në të njëjtin moment, në Aeroportin Ndërkombëtar "Nënë Tereza" është shënuar një takim i rastësishëm. Krerët e dy kampeve kryesore politike në vend janë kryqëzuar gjatë lëvizjeve të tyre.

Ndërsa avioni i Ramës mbërriti nga Nju Jorku, në terminalin e linjave ajrore u pa edhe kryetari i Partisë Demokratike, Sali Berisha.

Lideri i opozitës u shfaq duke hyrë në ambientet e aeroportit. Ai do të udhëtojë drejt Strasburgut. Aty pritet të ndjekë punimet e radhës të Asamblesë Parlamentare të Këshillit të Europës.