Qytetarët mund të vlerësojnë online shërbimet konsullore, Hoxha: Përmirësojmë së bashku shërbimin

Ministri i Evropës dhe Punëve të Jashtme, Ferit Hoxha, ka njoftuar se qytetarët tashmë do të mund të vlerësojnë në mënyrë elektronike cilësinë e shërbimeve konsullore. Sistemi i ri u prezantua nga Ministria përkatëse dhe synon të mbledhë drejtpërdrejt opinionet e qytetarëve.

Për çdo pikë shërbimi konsullor, përfshirë sportelet, sallat e pritjes, ndërtesën e Ministrisë, si dhe përfaqësitë diplomatike e konsullatat shqiptare jashtë vendit, do të vendoset një kod QR. Duke skanuar këtë kod, çdo person mund të plotësojë një formular dixhital dhe të japë përshtypjet e tij mbi shërbimin e marrë.

Objektivi i nismës sipas ministrit është të identifikohen problematikat specifike dhe të grumbullohen sugjerime konkrete nga qytetarët. Kjo do të ndihmojë në përmirësimin e shpejtësisë dhe cilësisë së ofrimit të këtyre shërbimeve.

“Me një skanim të thjeshtë, qytetarët do të mund të na japin përshtypjet e tyre për shërbimin, të evidentojnë problemet apo vërejtjet e tyre dhe, mbi të gjitha, të na thonë se çfarë mund të bëjmë ndryshe, më mirë dhe më shpejt. Dhe mesazhi ynë është i thjeshtë: na tregoni çfarë nuk funksionon, na sugjeroni çfarë mund të përmirësojmë dhe ne do të punojmë për ta bërë më mirë. Sepse shërbimi konsullor nuk është thjesht një procedurë administrative. Është një pikë kontakti mes shtetit dhe qytetarit. Dhe në atë pikë kontakti, shteti duhet të jetë i shpejtë, i thjeshtë, i aksesueshëm, profesional dhe i përgjegjshëm”, është shprehur Hoxha.

Kjo iniciativë është pjesë e një përpjekjeje më të gjerë për të afruar administratën me qytetarët. Vlerësimi i tyre do të përdoret si një mjet praktik për të orientuar përmirësimet e shërbimit konsullor.